نزیکەی 60 ملیار دیناری دیکە بۆ جووتیارانی هەرێمی کوردستان دابین دەکرێت

ئاڤا نیوز

ڕەزامەندی دراوە لەسەر خەرجکردنی 500 ملیار دینار وەک پشکی شەشەمی شایستە داراییەکانی جووتیارانی عێراق، پشکی هەرێمی کوردستان جیادەکرێتەوە و نزیکەی 60 ملیار دیناری دیکە خەرج دەکرێت.

وێنە گەورەکە: لەماوەی ڕۆژانی ڕابردوو 57 ملیار دینار بۆ جووتیارانی پارێزگاکانی هەرێمی کوردستان خەرجکرا، ئێستا لە سایلۆکان پارەکانیان وەردەگرن، بە خەرجکردنی بڕێکی دیکە کە نزیکەی 60 ملیار دەبێت، 200 ملیار دیناری جووتیارانی هەرێمی کوردستان لای وەزارەتی بازرگانی عێراق دەمێنێت.

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤای گوت، "لەگەڵ وەزارەتی بازرگانی عێراق قسەمان کردووە، بڕیارە تاوەکو پێنجشەممە پارەکەیان بۆ خەرج بکرێت، بە ئەگەری زۆرەوە پشکی هەرێی کوردستان دەورووبەری 60 ملیار دینار دەبێت."

ئەمەش بزانە: ئەو بڕەی بۆ هەر چوار پارێزگای هەرێمی کوردستان لە قۆناغی یەکەم خەرجکرا 57 ملیار دینار بوو، 20 ملیار بۆ هەولێر، 25 ملیار سلێمانی و هەڵەبجە، 12 ملیار دیناریش بۆ دهۆک تەرخانکرا.