پزیشکێکی کورد بەشداریی کۆنفرانسێکی نێودەوڵەتیی جوانکاری دەکات

ئاڤا نیوز

بۆ یەکەمجار پزیشکێکی کورد لەسەر ئاستی کوردستان و عێراق دەبێتە ئاندامی لیژنەی زانستی و  قسەکەری کۆنفرانسی AMWCـی مۆناکۆ لە دوبەی.

چیرۆکی سەرەکی: کۆنفرانسی AMWCـی مۆناکۆ ساڵانە بەڕێوە دەچێت و تیایدا چەندین بابەت و توێژینەوەی پزیشکیی تایبەت بە جوانکاری و دژەپیربوون لەلایەن بەشداربووانی کۆنفرانسەکەوە پێشکەش دەکرێت و گفتوگۆی زانستیی لەبارەوە دەکرێت.

لێدوانی فەرمی: د. هێمن زەمان، پسپۆڕی جوانکاری و نەخۆشییەکانی پێست، کە یەکێک لە بەشداربووانی کۆنفرانسەکەیە بە ئاڤا میدیای ڕاگەیاند، وەک تاکە پزیشکی کورد و ئەندامی لیژنەی زانستی بۆ هەڵسەنگاندن و تاوتوێی توێژینەوە زانستییەکان و قسەکەری کۆنفرانسەکە لەسەر ئاستی عێراق و کوردستان بەشداریی کردووە، هاوکات ئەو پزیشکانەی لە کۆنفرانسەکەدا وانە، وۆرک شۆپ و توێژینەوەکانیان پێشکەش دەکەن، لە زۆربەی وڵاتانی جیهانەوە هاتوون. 

ئەوەی پێویستە بیزانیت: د. هێمن گوتیشی پێشتر پزیشکانی کورد بەشداریی ئەو کۆنفرانسەیان کردووە، بەڵام وەکو ئامادەبوو و گوێگر نەک ئەندامی لیژنەی زانستیی کۆنفرانس.

زانیاریی زیاتر: کۆنفرانسەکە سێ ڕۆژی خایاند و ئەمڕۆ کۆتایی بە کارەکانی هێنا، لە میانی کۆنفراسەکەدا پێشانگەیەکی تایبەت بە چارەسەر و ئامێرە پزیشکییە تایبەتەکانی جوانکاریش کرایەوە.