دۆسیەی شەش هەزار خانەنشینی پێشمەرگە بۆ بەغدا دەنێردرێت

ئاڤا نیوز

 

بەڕێوەبەری گشتیی خانەنشینی پێشمەرگە کوردستان دەڵێت، دۆسیەی نزیکەی شەش هەزار پێشمەرگە و پلەدار و ئەفسەر کە لەسەرەتای ئەمساڵەوە خانەنشین کراون، بۆ بەغدا دەنێردرێت.

 

لێدوانی فەرمی: حاجی مەلا ئەمین، بەڕێوەبەری گشتیی خانەنشینی پێشمەرگە بە ئاڤای ڕاگەیاند، تا ئێستا 27 هەزار و 500 خانەنشینی پێشمەرگەیان خستووەتە سەر بەڕێوەبەرایەتی  گشتیی خانەنشینی هەرێمی كوردستان.

ئەوەی پێویستە بیزانیت؛ لەو ژمارەیە 13 هەزار و 500 خانەنشینیان سەر بە یەکەکانی حەفتا و هەشتان پێش ساڵی 2025 خانەنشین کراون، هەروەها نۆ هەزار و 500 خانەنشین سەر بە وەزارەتی پێشمەرگەن و لە ساڵانی 2010 بۆ 2025 خانەنشین کراون.

 

بەگوتەی بەڕێوەبەری گشتیی خانەنشینی پێشمەرگە، لە سەرەتای ئەمساڵەوە تاوەکو ئێستا نزیکەی شەش هەزار پێشمەرگە و پلەدار و ئەفسەر خانەنشین کراون، ئێستا ناوەكانیان لە سەرۆکایەتیی هەرێمی كوردستانە بۆ ئەوەی فەرمانی پێ دەربکرێت، لەم ڕۆژانە کارەکانی تەواو دەکرێن و دواتر ڕەوانەی وەزارەتی دارایی دەکرێت.

لەلایەکی دیکە؛ بە وتەی حاجی مەلا ئەمین، ڕۆژانە ئەو کەسانەی خانەنشینی دەیانگرێتەوە کارەکانیان ڕای دەكرێت و فەرمانی وەزاریان بۆ دەردەكرێ و بۆ وەزارەتی دارایی دەنێرێن، بۆ ئەوەی تەرخانی داراییان بۆ بكرێت پاشان ئاراستەی بەڕێوەبەرایەتی گشتیی خانەنشینی هەرێمی كوردستان و دواتریش ڕەوانەی بەغدا دەكرێن بۆ ئەوەی مووچەیان بۆ ببەسترێت.