شێخ دارا: سێ ڕۆژی دیكە كەشی هەرێمی كوردستان سارد دەبێت

ئاڤا نیوز

بەپێی پێشبینییەکان، لە سێ ڕۆژی داهاتوودا كەشێكی سارد ڕوو لە هەرێمی كوردستان دەكات و پلەکانی گەرما بەراورد بە ئەمڕۆ، پێنج بۆ شەش پلە دادەبەزن.

چیرۆکی سەرەکی: شەپۆلێكی ساردی جەمسەری بەستەڵەكی باكوور، لە دەریای سپیی ناوەڕاست نزیكبووەتەوە، لەوێشەوە كاریگەرییەكەی بەرەو وڵاتانی كەناراوەكانی ڕۆژهەڵات و باشووری دەریاكە، بەتایبەت ناوچەكانی ڕۆژهەڵاتی ناوەڕاست و باكووری ئەفریقا دەستپێدەكات.

لێدوانی فەرمی: شێخ دارا، پێشکەشکاری کەشوهەوای ئاڤا میدیا ڕایگەیاند، پلەکانی گەرما لە 72 كاتژمێری داهاتوودا، بەراورد بە ڕۆژانی ڕابردوو بەڕێژەیەكی بەرچاو دادەبەزن، بەتایبەت لەكاتی شەودا كەشوهەوا بەرەو ساردی دەڕوات.

ئاماژەی بەوەشكرد، بە ئەگەرێكی زۆرەوە لە چەند ناوچەیەكی باكووری كوردستان بەفر دەبارێت و ئەمەش كاریگەری لەسەر ساردبوونی كەشوهەوای هەرێمی كوردستان دەبێت، لەگەڵ ئەگەری بارانبارینی پچڕ پچڕ.

ئەوەی پێشبینی دەكرێت: بەپێی پێشبینییەكان، زستانی ئەمساڵی هەرێمی كوردستان لەڕووی بارانبارینەوە دڵخۆشکەر دەبێت و قەرەبووی دووساڵی ڕابردووی وشكەساڵی دەکاتەوە؛ بارانبارینی پەڵە لە ناوەڕاستی مانگی داهاتوو دەستپێبكات و بەرە بەرە چڕببێتەوە.