تۆمەتەکانی "ئەرجەنتین" مەشعان جبووری و خێزانەکەی لە خەونی بەدەستهێنانی کورسی پەرلەمان لەناوبرد

ئاڤا نیوز

لەگەڵ نزیکبوونەوەی وادەی هەڵبژاردنەکانی پەرلەمان، مشتوومڕ لەسەر بڕیارەکانی کۆمیسیۆنی باڵای سەربەخۆی هەڵبژاردنەکان بۆ دوورخستنەوەی کاندیدەکان زیاتر دەبێت، کە تا ئێستا سەدان کاندیدی گرتووەتەوە.

وێنە گەورەکە: کۆمیسیۆنی باڵای سەربەخۆی هەڵبژاردنەکان، بە پشتبەستن بە یاسای بنبڕکردنی بەعس، یان بەهۆی تۆماری تاوانکاری، لەسەرەتا پرۆسەی وردبینییەوە تاوەکو ئێستا نزیکەی 800 کاندیدی لە کێبڕکێی هەڵبژاردن دوورخستوونەتەوە.

ئەوەی پێویستە بیزانیت: یەکێک لە چیرۆکە هەرە دیارەکان بریتییە لە دوورخستنەوەی مەشعان جبووری، سەرۆکی حزبی وەتەن و پەرلەمانتاری پێشوو، لەگەڵ کوڕ و کچەکەیدا. ئەمەش لە کاتێکدایە کە خێزانەکە ئاواتی ئەوەیان بوو سێ کورسی پەرلەمان بەدەستبهێنن.

ئەمەش بزانە: لە هەڵبژاردنەکانی 2021دا، مەشعان جبووری لە چاوپێکەوتنێکی تەلەفزیۆنیدا ڕایگەیاندبوو کە خۆی و کوڕەکەی (یەزن) و کچەکەی (هەوازن) بەربژێرن بۆ پەرلەمان. هەرچەندە مەشعان جبووری کورسییەکەی بەدەست هێنا، بەڵام زۆری نەخایاند بە بڕیاری دادگا دوورخرایەوە بەهۆی تۆمەتی "ساختەکاری لە بڕوانامەی ئامادەییدا".

ئەوەی ئێستا ڕوودەدات: بۆ هەڵبژاردنەکانی ئەمجارە، مەشعان جبووری خۆی لە کاندیدبوون لەبەرژەوەندی کوڕەکەی "یەزن" کشاندەوە. یەزن هاوپەیمانییەکی سیاسی بۆ بەشداریکردن لە هەڵبژاردنەکان لە پارێزگاکانی دیالە، سەڵاحەددین و نەینەوا پێکهێنا. بەڵام کۆمیسیۆنی هەڵبژاردنەکان بەهۆی هەبوونی بڕیارێکی دادوەری و نەبوونی مەرجی "باشیی ڕەوشت و هەڵسوکەوت"ـەوە، کاندیدبوونی یەزنی ڕەتکردەوە. هاوکات، کۆمیسیۆن کاندیدبوونی هەوازن، کچی مەشعان جبووریشی ڕەتکردەوە، بەمەش خەونی خێزانەکە بۆ نوێنەرایەتی پەرلەمانی وەستێنرا. یەزن پێشتر لە ساڵی 2024دا زیندانی کرابوو بەهۆی تۆمارێکی دەنگییەوە کە گوایە باسی وەرگرتنی بەرتیل و ڕەشبگیریی تێدا کراوە، ئەوکاتە ڕاوێژکاری سەرۆکوەزیران بوو.

"هۆکارەکانی دەستێوەردان و دوورخستنەوەی بەئەنقەست"

مەشعان جبووری لە یەکەم کاردانەوەیدا بەرامبەر بڕیاری دوورخستنەوەی لە تۆڕی کۆمەڵایەتی X نووسیویەتی، "بڕیارەکە لەلایەن خاوەن دەسەڵاتەکانەوە سەپێنراوە، ئەوانەی دوورخستنەوەی ئێمەیان وەک دەستکەوتێک بۆ کاندیدەکانیان بینیوە." هەروەها ئاماژەی بەوەدا کە ئەوەی دەکرێت، جێبەجێکردنی فەرمانێکی "ئەرجەنتین"ـە، کە ئاماژەیەکی ناڕاستەوخۆیە بۆ ئێران.

لێدوانی فەرمی: یەزن مەشعان جبوورییش، سەرۆکی هاوپەیمانیی سقوور، لە لێدوانێکدا بۆ ئاڤا میدیا پێی وایە "بڕیاری دوورخستنەوەکەی سیاسی بووە و پشتی بە یاسا نەبەستووە و لایەنێکی دەرەکی دەستی تێدا هەبووە، بە هاوکاری لایەنە شیعەکان و ڕەنگە لایەنە سیاسییە سوننەکانیش، هەموویان نایانەوێت یەزن سەرکەوێت." یەزن جەختی لەوە کردەوە کە سەرەڕای دوورخستنەوەی خۆی و ڕەتکردنەوەی جێگرەوەکەی، بەردەوام دەبێت لە سەرۆکایەتیکردنی هاوپەیمانیی سقوور.

ڕوونکردنەوەی کۆمیسیۆنی هەڵبژاردنەکان

نیبراس ئەبو سوودە، یاریدەدەری وتەبێژی کۆمیسیۆن، لە لێدوانێکدا بۆ ئاڤا میدیا ئاماژەی بەوەدا کە سەرجەم بڕیارەکانی دوورخستنەوە بەپێی یاسا بوونە. لەبارەی ڕەتکردنەوەی گۆڕینەوەی کاندیدیش، ئاماژەی بەوەدا کە "ئەمە لە دەسەڵاتەکانی ئەنجوومەنی کۆمیسیارانە و بەپێی بەرژەوەندی گشتی لە بواری هەڵبژاردنەکاندا بڕیاری لێدراوە". هەروەها نکوڵی لە بوونی "لایەنی سیاسی" لە بڕیارەکانی دوورخستنەوەی کاندیدەکاندا کرد و ڕایگەیاند کۆمیسیۆن لە کارەکانیدا ملکەچی هیچ گوشارێکی سیاسی نەبووە.

پشێوی و بڕیاری تەکنیکی

سەعد ڕاوی، شارەزا لە کاروباری هەڵبژاردنەکان، لە لێدوانێکدا بۆ ئاڤا میدیا پێی وایە ڕووداوی دوورخستنەوەی یەزن و باوکی "دەرخەری دۆخێکی پشێوی و نەبوونی ئاشناییە بە یاسای هەڵبژاردنەکان لەلایەن سەرجەم کوتلەکانەوە". هەروەها ئاماژەی بەوەدا کە بڕیاری قەدەغەکردنی گۆڕینەوەی کاندید "بڕیارێکی تەواو تەکنیکییە نەک سیاسی". بەڵام پێی وایە کە کێشەکە لە دواخستنی پرۆسەی دوورخستنەوەکاندا بووە و دەبوو پێشتر دەرفەت بە هاوپەیمانییەکان بدرایە بۆ گۆڕینەوەی کاندیدەکانیان.