ڕوانگەی عێراقی سەوز: بەهۆی بانگەشەی هەڵبژاردنەکانەوە زیانێکی زۆر بە ژینگەی عێراق گەیشتووە

ئاڤا نیوز

لەگەڵ نزیکبوونەوەی هەڵبژاردن، کێبڕکێی کاندید و لیستەکان بە هەڵواسینی وێنە و پۆستەرەکانیان لە بانگەشەی هەڵبژاردنەکاندا بەردەوامە. بەشێک لە کاندیدان بەهۆی بانگەشەکردنەوە زیانێکی زۆریان لە ژینگە داوە.

زانیاریی بەدەستهاتوو: بەپێی ڕاپۆرتێکی نوێی ڕوانگەی عێراقی سەوز، کاندیدەکان لەپێناو مسۆگەرکردنی کورسی پەرلەمان، بە هەموو شێوەیەک و لە هەموو شوێنێک بانگەشە دەکەن، بەبێ ڕەچاوکردنی میزاجی خەڵک و یاسا و ڕێساکان پشتگوێ دەخەن. ئەمەش زیانێکی زۆری بە ژینگە گەیاندووە.

زانیاریی زیاتر: ڕوانگەکە ئاشکرای کردووە کە نزیکەی 250 هەزار درەخت لە سەرانسەری 15 پارێزگای عێراق (جگە لە هەرێمی کوردستان) زیانیان بەرکەوتووە بەهۆی هەڵمەتی بانگەشەی کاندیدەکانەوە. ئەم زیانانە بریتین لە بڕین و کونکردن و شکاندنی لقی درەختەکان بۆ ئەوەی شوێنێک بۆ هەڵواسینی پۆستەرەکانیان بکرێتەوە. جگە لەوەش، بەهۆی دانانی ئەم ڕیکلامانەوە زیان بە بۆڕییەکانی ئاو، نافورەکان، دیکۆرەکانی ڕووناکی و شۆستەکانیش گەیشتووە.

خاڵە ئەرێنییەکان: لە ڕاپۆرتەکەی ڕوانگەی عێراقی هاتووە، لە هەر سێ پارێزگاکەی هەرێمی کوردستان پابەندبوونێکی باشتر بە پرسی دوورکەوتنەوە لە درەختەکان و وێنە و پۆستەر هەڵواسین  بەدی کراوە.

ئەمەش بزانە: ڕوانگەی عێراقی سەوز داوا لە لایەنە پەیوەندیدارەکان دەکات کە سزای تووند بەسەر سەرپێچیکاراندا بسەپێنن و درێغی نەکەن لە جێبەجێکردنی یاسا.