دابەشکردنی مووچەی مانگی 10 لە عێراق دەستپێدەکات

ئاڤا نیوز

بەگوێرەی زانیارییەکان ئەمڕۆ دووشەممە وەزارەتی دارایی عێراق بڕیاری دابەشکردنی مووچەی مانگی 10ـی فەرمانبەرانی دەرکردوە و سەرەتا بە دابەشکردنی مووچە بەسەر هێزە ئەمنییەکان دەستپێدەکات.

وێنە گەورەکە: دابەشکردنی مووچە لە پارێزگاکانی عێراق لە کاتێکدایە دوو هەفتەیە محەممەد شیاع سوودانی، سەرۆکوەزیرانی عێراق بەڵێنی خەرجکردنی مووچەی مانگی هەشتی فەرمانبەرانی هەرێمی کوردستانی داوە و هێشتا خەرج نەکراوە.

زانیاریی بەدەستهاتوو: ئاڤا زانیویەتی ئەمڕۆ دووشەممە حکومەتی عێراق دەستیکرد بە دابەشکردنی مووچەی مانگی 10ـی فەرمانبەران و ھێزە ئەمنییەکان. وەک سەرەتا بە مووچەی هێزە ئەمنییەکان دەستپێدەکات و دواتریش وەزارەتە خزمەتگوزارییەکان مووچە وەردەگرن.

زانیاریی زیاتر: چەند مانگێکە بەرپرسانی حکومەتی عێراق ڕایدەگەیەنن کە کێشەی نەختینەی بانکیان هەیە، بەڵام لەگەڵ ئەوەشدا دابەشکردنی مووچە لە عێراق نەوەستاوە.

ئەوەی پێویستە بیزانیت: مانگانە حکومەتی عێراق لەنێوان 19 بۆ 20ـی مانگ دەست بە دابەشکردنی مووچەی وەزارەتەکانی دەکات. بەڵام ماوەی چەند مانگێکە بە بیانووی جیاواز مووچەی فەرمانبەرانی کوردستان دوادەخات.