ئاڤا بەدواداچوون بۆ ڕاوکردنی باڵندەی شاهین دەکات لە کوردستان

ئاڤا نیوز

ژمارەیەک ڕاوچی باڵندەیەکی دەگمەن و گرانبەها لە هەرێمی کوردستان ڕاو دەکەن، ئێستا سکاڵا تۆمار کراوە و داوای دەستگیرکردنی ڕاوچییەکان دەکرێت.

چیرۆکی سەرەکی: شاهین مێیەی بازە، جۆرێکی دەگمەنی باڵندەیە و لە هەرێمی کوردستان هەیە، لە کوردستانیش تەنها لە ناوچەی گەرمیان هەیە، لە وڵاتانی کەنداویش هەیە، بەڵام وەکوو ئەم جۆرەی کوردستان نییە، لە ساڵانی ڕابردوو وڵاتانی خەلیج داوایان لە عێراق کردووە، تاوەکو بێن و لە کوردستان شاهین ڕاو بکەن، بەڵام لایەنی پەیوەندیدار بەم داوایە ڕازی نەبوون.

زانیاریی زیاتر: چەند ڕۆژێکە لە تۆڕەکۆمەڵایەتییەکان گرتە ڤیدیۆیەک زۆر بڵاوبووەتەوە، چەند ڕاوچییەک شاهینیان ڕاو کردووە، خۆیان ڤیدیۆیان کردووە، ئێستا ڕێکخراوە ژینگەییەکان و ژینگەدۆستان سکاڵایان تۆمار کردووە و داوای دەستگیر کردنیان دەکەن.

ئەوەی پێویستە بیزانیت: شاهین خێراترین باڵندەی جیهانە، کە نرخی زۆر گرانە، پارتی سەوزی کوردستان دەڵێت: 100 دەفتەر دۆلار زیاتر دەکات، لە هەرێمی کوردستان ڕاوکردنی قەدەغەیە و هەر کەسێک ئەو باڵندەیە ڕاو بکات بە 10  ملیۆن دینار سزا دەدرێت.

لێدوانی فەرمی: ملکۆ بازیانی، سەرۆکی پارتی سەوزی کوردستان بە ئاڤای ڕاگەیاند: نازانین ئایا لە سنووری گەرمیان، یان لە دەرەوەی سنووری هەرێمی کوردستان ئەم باڵندەیە ڕاوکراوە، بەڵام دیارە کە نزیکی دەڤەری گەرمیانە، سکاڵامان تۆمار کردووە و داوای دەستبەجێ دەستگیرکردنی ڕاوچییەکانمان کردووە.

دەشڵێت، ڕاوچییەکان عەرەبن، بەڵام ڕەنگە چاوساغەکەیان کورد بووبێت و شارەزای مەنتیقەکە بووبێت.
پەیوەندیمان بە دادگای تێهەڵچوونەوەی کەرکووک-گەرمیان کرد، گوتیان لەگەڵ فەرمانگەی داواکاری گشتیی گەرمیان لەسەر خەتین، بەڵام تاوەکو ئێستا زانیارییان نییە، ئایا لە سنووری هەرێمی کوردستان ڕاوکراوە یان لە ناوچەکانی ژێر دەسەڵاتی حکومەتی عێراق.