نەتەوە یەکگرتووەکان داوای ڕاگرتنی هەناردەی چەک بۆ ئیسرائیل دەکات

ئاڤا نیوز

ئەنجوومەنی مافەکانی مرۆڤی سەر بە نەتەوە یەکگرتووەکان داوا دەکات هەناردەی چەک بۆ ئیسرائیل بە تەواوەتی ڕابگیرێت. ئەنجوومەنەکە هۆشداری داوە لەوەی کە شەڕی ئیسرائیل لە غەززە جینۆسایدی لێدەکەوێتەوە.

وێنە گەورەکە: لە کۆی 47 ئەندامی ئەنجوومەنەکە 28 ئەندام دەنگیان بە بەڵێ لە سەر ئەو بڕیارە داوە؛ هاوکات شەش ئەندام بە نەخێر دەنگیان داوە و 13 ئەندامیش خۆیان لە دەنگدان پاراستووە. لەوەتەی شەڕی غەززە دەستیپێکردووە، ئەمە یەکەمجارە ئەم ئەنجوومەنە بڕیارنامەیەکی لەو جۆرە دەربکات کە تیایدا داوا لە وڵاتانی جیهان دەکات بۆ ڕێگریکردن لە ڕوودانی جینۆساید و کەوتنەوەی قوربانیی زیاتر، هەناردەکردنی چەک بۆ ئیسرائیل ڕابگرن.

باکگراوند: هێرشی ئیسرائیل بۆ غەززە 33 هەزار کوژراوی لێکەوتووەتەوە کە زۆربەیان ژن و منداڵن. هاوکات لە ڕۆژانی ڕابردوودا ئیسرائیل کاروانێکی فریاگوزارییە مرۆییەکانیشی کردە ئامانج و حەوت کارمەندی فریاگوزاری کوژران.