شاندێک بۆ 12 مووچەكەی خانەنشینان دەچێتە بەغدا

ئاڤا نیوز

حکومەتی هەرێمی کوردستان بەچڕی کار لەسەر جێبەجێکردنی ڕێککارەکان دەکات بۆ خەرجکردنی 12 مووچەی ئیکرامییەی خانەنشینان، بڕیارە پێش هەڵبژاردن شاندێک بۆ ئەو مەبەستە سەردانی بەغدا بکات.

وێنە گەورەکە: لە سەرەتای ئەمساڵەوە زیاتر لە 27 هەزار فەرمانبەر خانەنشین بوون، هەر فەرمانبەرێک 25 ساڵ خزمەتی هەبێت 12 مووچەی کاملی ئیکرامییە دەیگرێتەوە و دەبێت وەزارەتی دارایی عێراق بیدات، بەڵام لە سەرەتای ئەمساڵەوە هیچ خانەنشینێک وەری نەگرتووە.

ئەوەی پێویستە بیزانیت: هەزاران خانەنشین شمولی 12 مووچەکە دەکەن، لە ساڵی دارایی 2025 تەرخانی داراییان بۆ کراوە و پێویستی بە ملیاران دینارە، مانگانەش لەگەڵ لیستی نوێی مووچەی خانەنشینان ناوی ئەوان جیاکراوەتەوە، بەڵام تاوەکو ئێستا وەزارەتی دارایی عێراق ڕەزامەندی لەسەر خەرجکردنی نەداوە.

لێدوانی فەرمی: سەرچاوەیەک لە بەڕێوەبەرایەتی گشتیی خانەنشنیی هەرێمی کوردستان بە ئاڤای گوت، ئێستا سەرقاڵی ئەوەن ناوی سەرجەم ئەو خانەنشینانەی 12 مووچەکە دەیانگرێتەوە بکرێتە یەک لیست، پێش هەڵبژاردن شاندێک سەردانی بەغدا دەکات و لەگەڵ وەزارەتی دارایی عێراق گفتوگۆی لەسەر دەکەن، چونکە مافێکی یاسایی خانەنشینانە و لە یاسای خانەنشینی ساڵی 2014ـی عێراق ئاماژەی پێدراوە.