لە دۆڵی ئاكۆیان سەدان داری تەڕ بڕاونەتەوە؛ تەمەنی بەشێكیان سەرووی 50 ساڵە

ئاڤا نیوز

لە دۆڵی ئاكۆیان، سەدان دار بەڕووی تەڕ بڕاونەتەوە كە تەمەنی بەشێك لەو دارانە سەرووی پەنجا ساڵە، بەرپرسی فه‌رمانگه‌ی ژینگه‌ی ئیداره‌ی سۆرانیش دەڵێت: فەرمانگەكەمان بەهەماهەنگی لەگەڵ بەشی پۆلیسی دارستان و ژینگەی ڕواندز و هۆبەی دارستان و پاوان و هێزە ئەمنییەكانی ناوچەكە، بەوردی كار دەكەین بۆ دۆزینەوەی سەرپێچیكاران و ڕادەستكردنیان بە یاسا.

چیرۆكی سەرەكی: لە سنووری دۆڵی ئاكۆیان سەر بە قەزای ڕواندز، چەند کەسێک هەڵساون بە بڕینی سەدان داری بەڕووی تەڕ، ئەمەش دووەم حاڵەتی لەمجۆرەیە لە ماوەیەكی كورتدا، دوای ڕوودانی حاڵەتێكی هاوشێوە لە دۆڵی فەقێیانی سەر بە ڕواندز.

لێدوانی فەرمی: هەژار ماهیر، بەرپرسی فەرمانگەی ژینگەی ئیدارەی سۆران بە ئاڤای ڕایگەیاند، دادگا پەڕاوی لێكۆڵینەوەی لەسەر ئەو ڕووداوە كردووەتەوە و ڕۆژی یەكشەممەی هەفتەی داهاتوو، دادوەری لێكۆڵینەوەی ڕواندز، لەسەر سكاڵای گوندنشینان و بەپشتبەستن بە وتەی شایەدحاڵەكان و سەیركردنەوەی كامێرا چاودێرییەكانی ئەو شوێنە، بڕیاری دەستگیركردن بۆ ژمارەیەك تۆمەتبار دەدات كە گومان دەكرێت دەستیان لەو سەرپێچیە هەیە.

زانیاریی زیاتر: بەرپرسی فەرمانگەی ژینگەی ئیدارەی سۆران ئاماژەی بەوەشكرد، ئەوەی جێی نیگەرانییە، سەرپێچیكاران ئەو جۆرە دار بەڕووانەیان بڕیوەتەوە كە لە جۆری تەڕن و لەژێرەوەی قەدەكەی بڕاوەتەوە، بەجۆرێك تەمەنی بەشێك لەو دارانە، سەرووی 25 ساڵ و 50 ساڵن.

هۆکارە زانراوەکان: داری تەڕ بەراورد بە داری وشك نرخی گرانترە، بەو پێیەی، لەكاتی بەكارهێنانی لە سۆپای دار، كاتێكی زیاتر دەمێنێتەوە و زۆرتر سوودی لێ وەردەگیرێت، بۆیە سەرپێچیكارانی سەر ژینگە، بەردەوام داری تەڕ بەجێگەی داری وشك دەكەنە ئامانج.