سێ هەفتەیە ئاگری دارستانەکانی ئێران خامۆش نەبووە

ئاڤا نیوز

میدیاکانی ئێران بڵاویان کردووەتەوە، نزیکەی مانگێکە بە هۆکارێکی نەزانراو ئاگرێکی بەرفراوان دارستانەکانی پارێزگای مازەندەرانی گرتووەتەوە و دارستانە چڕەکان بەردەوام دەسوتێن و مەترسی فراوانتربوونی هەیە. ئێران داوای هاوکاری لە وڵاتانی دراوسێ دەکات.

چی ڕوودەدات: بەهۆی بەرفراوانی و چڕی دارستان و بەرزی چیاکان ساڵانە بەهۆکاری جۆراوجۆر ڕووداوی ئاگرکەوتنەوە لە دارستانەکانی ئێران دروست دەبێت و کۆنتڕۆڵکردنی ئاسان نابێت، ماوەی سێ هەفتەیە ئاگرێکی گەورە لە دارستانەکانی هیرکان کەوتووەتەوە و وتیمەکانی بەرگری شارستانی، هێزەکانی ناوخۆ، خۆبەخشان و دانیشتووانی گوندەکان بە شەش هێلیکۆپتەری ئاگرکوژێنەوە  شەو و ڕۆژ هەوڵی کوژاندنەوەی ئاگرەکە دەدەن. دوای ئەوەی ئێران بۆ کوژاندنەوەی ئاگرەکە داوای هاوکاری لە وڵاتانی دراوسێ کرد، وابڕیارە ئەمڕۆ شەممە، دوو فرۆکەی ئاگرکوژێنەوەی تورکیا بگەنە شوێنی ڕووداوەکە.

 
لێدوانی فەرمی: حوسێن عەلی، بەڕێوەبەری گشتیی بەڕێوەبردنی قەیرانەکان لە پارێزگای مازەندەران، بە پشتبەستن بە داتاکانی ڕێکخراوی کەشناسی، بە میدیاکانی ئەو وڵاتەی ڕاگەیاندووە و هۆشداریداوە لەوەی کە پێشبینی دەکرێت لە چەند ڕۆژی داهاتوودا لە ناوچە بەرزەکاندا باران نەبارێت و پلەکانی گەرما بەرزببنەوە، بای گەرم هەڵبکات ئەمەش ئاگرەکە فراوانتر دەکات.

" هۆکاری ئاگرکەوتنەوەکە پێدەچێت بە دەستی مرۆڤ بووبێت جا بە ئەنقەست بێت یان بێ مەبەست" 

لەلایەکی دیکەوە: ئەعزەم بێهرامی، شارەزای ژینگە بە کەناڵی بی بی سی فارسی ڕاگەیاند، تا ئێستا 10 هێکتار زەوی لە دارستانەکانی هیرکان سووتاوە، گوتیشی هۆکاری تەشەنەسەندنی ئاگرەکە گۆڕانکاری کەش و هەواو زۆری پوش و پەڵاشی کەڵەکەبووی دەیان ساڵە لە چیا سەخت و بەرزەکاندا.

زیانە سەرەکییەکان: تا دێت زیانەکانی ئاگرەکە زیاد دەکەن، بەهۆی فراوانبوون و تەشەنە سەندنی ئاگرەکە هەندێک لە دارستانە چڕەکانی سنوری کۆماری ئازەربایجانیش دەستوتێن، بە 60 ئۆپراسیۆن و 400 تیم ئاگرەکە کۆنتڕۆڵ نەکراوە. لە ڕووداوەکەدا تا ئێستا لانیکەم 20 کەس بەهۆی کەوتنەخوارەوە و هەڵمژینی دوکەڵ و لەکاتی کوژاندنەوەی ئاگرەکە برینداربوونە و چوار کەسیش سووتان و بەهۆی زۆری ڕێژەی سووتاویەکەیان ڕەوانەی نەخۆشخانە کراون.

ئەمەش بزانە: دارستانەکانی هیرکان، بە میراتێکی سروشتی گرنگی ئێران دادەنرێن و لە لیستی میراتی جیهانی یونسکۆدا تۆمارکراوە و ڕۆڵێکی گرنگی هەیە لە بەردەوامی ژینگەیی ئێران.  ڕووبەری بەڕێوبەرایەتی گشتی سامانە سرووشتییەکانی پارێزگای مازەندەران، لە نۆشار و زیاتر لە 660 هەزار هێکتار دارستان، لەوەڕگە و سەیرانگا پێکدێت، شوێنی ژیانکردنی  226 جۆری باڵندە و 98 ئاژەڵی شیردەرە.