لە بەغدا کۆبوونەوەیەکی بەپەلە بۆ ڕووبەڕووبوونەوەی پیسبوونی هەوا ئەنجام درا

ئاڤا نیوز

بۆ چارەسەرکردنی قەیرانی پیسبوونی کەش و هەوای بەغدا، کۆبوونەوەیەکی فراوان و بەپەلە بەئامادەبوونی نوێنەرانی وەزارەتی ژینگە و ژمارەیەک لە بەڕێوەبەری فەرمانگە پەیوەندیدارەکان لەبەغدا ئەنجام درا.

چیرۆکی سەرەکی: ماوەی چەند هەفتەیەکە ئاسمانی شاری بەغدا بەردەوام لەژێر کاریگەریی بۆنی گۆگرد دایە کە لە کارگەکان و شوێنەکانی کۆکردنەوەی زبڵەوە دەردەچێت، جگە لەوەش، دووکەڵی مۆلیدە ئەهلییەکان و بوونی لانی کەم سێ ملیۆن ئۆتۆمبێل لە شەقامەکاندا، ژینگەی بەغدایان بەجۆرێک پیسکردووە بەردەوام لە پۆڵێنە جیهانییەکان لە ڕیزی پێشەوەی ئەو وڵاتانەیە کە ژینگەکەیان تەواو پیس بووە.

لێدوانی فەرمی: عەتوان عەتوانی، پارێزگاری بەغدا ڕایگەیاند: چەند سەرچاوەیەکی دیار بۆ پیسبوونی شاری بەغدا دەستنیشان کراوە لەوانە شوێنی کۆکردنەوەی زبڵ و خاشاک لە سەربازگەی ڕەشید، شوێنی ژێرخاککردنی خاشاکی نەهرەوان و دیاردەی سووتاندنی زبڵ لەنێو گەڕەکەکاندا، هەروەها دوکەڵی کارگەکانی خشت لەدەورووبەری بەغدا کاریگەرییەکی زۆریان لەسەر پیسبوونی ژینگەی بەغدا هەیە.

زانیاریی زیاتر: عەتوانی تەواوی بەرپرسیارێتیی خراپبوونی دۆخی ژینگەیی خستە ئەستۆی لایەنە کەمتەرخەمەکان و جەختی کردەوە لەسەر پێویستیی دەستوەردانی هێزە ئەمنییەکان بۆ گرتنەبەری ڕێکاری توند دژی ئەوانەی دەبنە هۆی پیسکردنی ژینگەی پایتەخت.

ئەمەش بزانە: دوای بڵاوبوونەوەی دەیان ڕاپۆرت لەسەر مەترسیی دۆخی کەش و هەوای بەغدا، محەممەد شیاع سوودانی، سەرۆکوەزیرانی عێراق بڕیاری پێکهێنانی لیژنەیەکی تایبەتی دا بۆ بەدواداچوون لەم بابەتە، بەڵام لە سایەی ئەو هەموو هۆکارە زۆر و ئاڵۆزەی کە هەوای شارەکەیان ژەهراوی کردووە، وا دەردەکەوێت کە کاری لیژنەکە و دۆزینەوەی چارەسەرێکی خێرا، ئەرکێکی زۆر سەختبێت و بەگوێرەی پسپۆڕانی ژینگە چارەسەری ژینگەی عێراق پێویستی بەکاری بەردەوامی دەیان ساڵە و بەلیژنە و بەدواداچوون چارەسەر ناکرێت.