سوودانی یەکەم بەشی پڕۆژەی "ڕێگای گەشەپێدان" دەکاتەوە

ئاڤا نیوز

بەمەبەستی کردنەوەی بەشی یەکەمی پڕۆژەی ڕێگای گەشەپێدان، سوودانی سەردانی پارێزگای بەسرە دەکات.

زانیاریی بەدەستهاتوو: بڕیارە سبەی پێنجشەممە، محەممەد شیاع سوودانی، وەک یەکەم بەشی پڕۆژەی ڕێگای گەشەپێدان، ڕێگای نێوان بەندەری فاو و ڕێگای نێودەوڵەتی سەفوان کە بە تونێلە ژێرئاوییەکەدا تێدەپەڕێت و درێژییەکەی 63 کیلۆمەترە، بکاتەوە.

ژمارەکان وادەڵێن: بودجەی وەبەرهێنانی پڕۆژەکە نزیکەی 17 ملیار دۆلارە، کە دابەش بووە بەسەر 6.5 ملیار بۆ ڕێگا خێراکە و 10.5 ملیار بۆ هێڵی شەمەندەفەری کارەبایی، لە سێ قۆناغدا جێبەجێ دەکرێت کە لە ساڵانی 2028، 2033 و 2050 کۆتاییان دێت.

خاڵه‌ ئه‌رێنییه‌كان: ئامانجی پڕۆژەکە، کە ڕێگایەکی وشکانی و هێڵێکی ئاسنین بە درێژایی 1200 کیلۆمەتر لە ناوخۆی عێراق لەخۆدەگرێت، بریتییە لە بەهێزکردنی تەواوکاریی ئابووری لە نێوان ڕۆژهەڵات و ڕۆژئاوا، زیادکردنی بازرگانیی نێودەوڵەتی و ئاسانکاری بۆ جووڵەی کاڵاکان.

باکگراوند: لە نیسانی ساڵی 2024، عێراق، تورکیا، ئیمارات و قەتەر ڕێککەوتنێکی چوارقۆڵییان بۆ پڕۆژەی ڕێگای گەشەپێدانی عێراق، بە سەرپەرشتی محەممەد شیاع سوودانی، سەرۆکوەزیرانی عێراق و ڕەجەب تەیب ئەردۆغان، سەرۆککۆماری تورکیا، واژۆ کرد.