لەسەر دوو کچی کوردی ئێزدی ژن و مێردێکی عێراقی لە ئەڵمانیا دەستگیر کران

ئاڤا نیوز 

 

داواکاری گشتیی ئەڵمانیا دەستگیرکردنی ژن و مێردێکی عێراقی بە تاوانی "بەکۆیلەکردنی دوو کچی کوردی ئێزدی" ڕادەگەیێنێت، گومانی ئەوەشیان لێ دەکەن ئەندامی ڕێکخراوی داعش بووبن.

 

وێنە گەورەکە: ساڵی 2014 ڕێکخراوی داعش هێرشی كردە سەر دەڤەری شنگال و بە هەزاران هاونیشتمانی کوردی ئێزدی كەوتنە دەست ڕێکخراوەکە، بەشێكی زۆر لە پیاوە دەستگیركراوەكان گولـلەباران كران و كچ و ژنەكانیشیان ڕفاندن.

 

چیرۆکی سەرەکی: پۆلیسی ئەڵمانیا ژن و مێردێکی عێراقی دەستگیرکردووە کە پێدەچێت ئەندامی داعش بن، بە تاوانی خراپ مامەڵەکردن لەگەڵ دوو کچی کوردی ئێزدی لە نێوان ساڵەکانی 2015 بۆ 2017 لە عێراق و سووریا.

 

ڕاگەیێنراوی فەرمی: داواکاری گشتیی ئەڵمانیا ڕایگەیاندووە، دوو کچەکە ڕووبەڕووی "دەستدرێژی جەستەیی و سێکسی" کراونەتەوە، هاوکات ڕێگرییان لێکراوە لەوەی ڕێوڕەسمە ئاینییەکانیان جێبەجێ بکەن. 

 

زانیاریی زیاتر:  هاوژینەکان دوو کچەکەیان ڕادەستی ئەندامانی دیکەی داعش کردووە، پێش ئەوەی لە مانگی تشرینی دووەمی 2017 سووریا جێبهێڵن.

 

باکگراوند: داعش لە شنگال شەش هەزار و 417 کەسی ڕفاند. بەگوێرەی نووسینگەی ڕزگارکردنی ڕفێندراوانی دەستی داعش، تاوەکو ئێستا سێ هەزار و 575 کوردی ئێزدی ڕزگار کراون.