دوایین دەرفەت بۆ 30 هەزار مووچەخۆر

ئاڤا نیوز

هۆشداریی كۆتایی بە 30 هەزار وارسی شەهیدان و ئەنفالكراوان، بەركەوتووانی چەكی كیمیایی و زیندانیانی سیاسی دەدرێت؛ ئەوانەی تا ئێستا خۆیان لە هەژماری من تۆمار نەكردووە، بەپەلە لەڕێگەی ئەو بانكانەی مووچە وەردەگرن خۆیان تۆمار بكەن بۆ ئەوەی مووچەكانیان ڕانەگیرێت.

چیرۆکی سەرەکی: وەزارەتی دارایی و ئابووری نووسراوێكی فەرمی ئاڕاستەی سەرجەم بەڕێوەبەرایەتیە گشتییەكانی سەر بە وەزارەتەكە كردووە، داوای لێكردوون كاری پێویست ئەنجام بدەن بۆ تۆماركردنی سەرجەم كەسوكاری شەهیدان و زیندانیانی سیاسی و بەركەوتووانی چەكی كیمیایی لە پرۆژەی هەژمار من، بەو پێیەی لە ساڵی نوێدا مووچە تەنیا لەڕێگەی هەژماری من خەرج دەكرێت و بە كاش نامێنێت.

لێدوانی فەرمی: مەحمود سەرمۆردی، بەڕێوەبەری ڕاگەیاندن و پەیوەندییەكانی بەڕێوەبەرایەتیی گشتیی كاروباری شەهیدان و ئەنفالكراوانی سلێمانی، لەڕێگەی ئاڤاوە، سەرجەم كەسوكاری سەربەرزی شەهیدان، جینۆسایدكراوان، بەركەوتووانی چەكی كیمیایی، زیندانیانی سیاسی ئاگادار كردەوە ئەوانەی تا ئێستا مامەڵەی هەژماری من ـیان تەواونەكردووە، بە زووترین كات سەردانی ئەو بانكانە بكەن كە مووچەی لێ وەردەرگن، چونكە ئەگەر خۆیان لە هەژماری من تۆمار نەكەن، ئەوا ساڵی نوێ كە تەنیا چەند ڕۆژێكی ماوە، ناتوانن مووچەكانیان وەربگرن.

ژمارەکان وادەڵێن: بەپێی زانیارییەکانی ئاڤا، تا ئێستا نزیکەی 30 هەزار کەس ماون کە خۆیان لە پرۆژەی هەژماری من تۆمار نەکردووە.