فەرەنسا گەشتکردن بۆ چەند وڵاتێكی ڕۆژهەڵاتی ناوەڕاست قەدەغە دەکات

ئاڤا نیوز 

وەزارەتی دەرەوەی فەرەنسا، داوا لە هاووڵاتییانی دەکات، بەهۆی مەترسییەکانی شەڕ گەشت بۆ ئێران، لوبنان، ئیسرائیل و فەڵەستین نەکەن.

وێنە گەورەکە:  ئێران هەڕەشەی تۆڵەسەندنەوەی" کوژرانی فەرماندە و بەرپرسانی سوپاکەی بەهۆی هێرشەکەی سووریا" لە ئیسرائیل دەکات، بەمەش مەترسی زیادبوونی توندووتیژی لە ڕۆژهەڵاتی ناوەڕاست هەیە.

لێدوانی فەرمی: ستیڤان سیجۆرن، وەزیری دەرەوەی فەرەنسا گوتی: داوا لە ئەندامانی بنەماڵەی دیپلۆماتکارانی فەرەنسی دەکەین ئێران جێبهێڵن و هیچ فەرمانبەرێکی مەدەنی فەڕەنسی بۆ نوێنەرایەتییەکان بۆ ئەو وڵاتانەی کە لە لیستەکەدا هاتووە، نەنێردرێت، ئەو وڵاتانەش هەریەک لە لوبنان و فەڵەستین و ئیسرائیلن.

ئەوەی ئێسات ڕوودەدات: لە دوای حەوتی ئۆکتۆبەری ساڵی ڕابردووەوە کە شەڕی ئیسرائیل و حەماس لە غەززە هەڵگیرسا، ئیسرائیل سنووری هێرشەکانی فراونتر کردووە، لەگەڵ بۆردوومانە بەردەوامەکانی غەززە، هێرشەکانی بۆ سەر حەماس وهاوپەیمانەکانی سەر بە ئێران لە سووریا و لوبنان چڕ کردووەتەوە.