ئێران: هێرشەکەی ئێمە ئیسرائیل پەشیمان دەکاتەوە

ئاڤا نیوز

ڕاوێژکارێكی باڵای خامنەیی ڕایدەگەیێنێت، ئیسرائیل لە توڵەسەندنەوە چاوەڕوانکراوەکەی ئێران دەترسێت.

وێنە گەورەکە: چاوەڕوان دەکرێت لە داهاتووێکی نزیکدا ئێران وەڵامی هێرشی ئیسرائیل بداتەوە کە لە دیمەشق کونسوڵخانەکەیانی بۆردوومان کرد و بەهۆیەوە حەوت بەرپرسی باڵای سەربازی و دیپلۆماتکاری ئەو وڵاتە كوژران.

لێدوانی فەرمی: یەحیا ڕەحیم سەفەوی، یاردیدەدەر و ڕاوێژکاری خامنەیی، ڕێبەری باڵای کۆماری ئیسلامیی ئێران ڕایگەیاند: ئیسرائیل لە تۆڵەسەندنەوە و لێدانە چاوەڕوانکراوەکەی ئێمە ترسی هەیە، کە بەجۆرێکە وا دەکات پەشیمان ببێتەوە لەو هێرشەی کردە سەر کونسوڵخانەی ئێران لە دیمەشق.

زانیاریی زیاتر: ئیسرائیل بەهۆی "بەڵێنی" تۆڵەسەندنەوەی ئێران هێرشی سەربازییان بۆ سەر ڕەفەح ڕاگرت، چونکە نازانن ئێران چۆن و کەی و بە چ شێوەیەک تۆڵەی خۆی دەکاتەوە و هەر بەم هۆیەشەوە لە دۆخی ترس و دڵەڕاوکێدان. سەفەوی وای گوتووە.