تەقینەوەیەک لە نزیک کۆنسوڵخانەی ئێران لە دیمەشق ڕوویدا

ئاڤا نیوز

 

 لە کات و شوێنێکی هەستیاردا، بۆمبێکی چێنراو لەنێو ئۆتۆمبێلێکدا لە مەیدانی "هودا" لە ناوچەی "مزە" لە دیمەشقی پایتەختی سووریا تەقییەوە، کە نزیکە لە کۆنسوڵخانەی ئێران.

ڕاگەیێنراوی فەرمی: پۆلیسی دیمەشق ڕایگەیاند: تەقینەوەکە کەمێک لەمەوبەر ڕوویداوە و تەنیا زیانی ماددی هەبووە. بەبێ ئەوەی هیچ زانیارییەکی دیکە ئاشکرا بکات.

لەلایەکی دیکەوە: ڕوانگەی سووریا بۆ مافەکانی مرۆڤ ڕایگەیاند: بۆمبە چێنراوەکە لەلایەن کەسانی نەناسراوەوە لە ئۆتۆمبێلێکی جۆری "جییپ" بەستراوە و  لەنزیک چێشتخانەیەک کە تەنیا دوو کیلۆمەتر لە کۆنسوڵخانەی ئێران دوورە تەقیوەتەوە.

ئەوەی لەوبارەیەوە دەگوترێت: بەشێک لەمیدیاکان باس لەوەدەکەن، لەکاتی تەقینەوەکەدا شۆفێری ئۆتۆمبێلەکە لەوێ نەبووە و ئەو ناوچەیەش زۆرێک لە کەسانی لایەنگری ئێران و بیانییەکان تێیدا دەمێننەوە، جگە لە ئەفسەرانی سوپای سووریا.

باکگراوند: هەشتی ئەم مانگە، ئیسرائیل کۆنسوڵخانەی ئێرانی لەنزیک دیمەشق کردە ئامانج، حەوت بەرپرسی سەربازی و دیپلۆماسی ئێران لە هێرشەکەدا کوژران.

کاریگەری و لێکەوتەکان: دوای هێرش بۆ سەر کۆنسوڵخانەی ئێران لە دیمەشق، ئێران هەڕەشەی تۆڵەکردنەوەی لە ئیسرائیل کرد، ئیسرائیلیش ئامادەیی خۆی بۆ وەڵامدانەوە پێشاندا.

وێنە گەورەکە: ئێران بەردەوامە لە هەڕەشەکانی و شەوی ڕابردوو حیزبوڵڵای لوبنان کە نزیکە لە ئێران بە مووشەک و درۆن باکووری ئیسرائیلی کردە ئامانج، میدیاکانی ئەمریکاش دەڵێن "ئێران ڕاستەوخۆ هێرش دەکاتە سەر ئیسرائیل".