ڕاوێژکارێکی خامنەیی: لە شەڕی دەروونی لەگەڵ ئیسرائیل سەرکەوتووین

ئاڤا نیوز

ڕاوێژکارێکی خامنەیی بەشانازییەوە باسی شەڕی دەروونی و هەڕەشە بەردەوامەکانی ئێران بۆ تۆڵەسەندنەوە لە ئیسرائیل دەکات و دەڵێت: "ئیسرائیلمان پەشیمان کردەوە لە هێرشەکەی دیمەشق".

وێنە گەورەکە: لە تۆڵەی بۆردوومانکردنی باڵیۆزخانەکەیان لە دیمەشق لەلایەن ئیسرائیلەوە کە بەهۆیەوە ژمارەیەک فەرماندەی سەربازی و دیپلۆماتکار کوژران، چەند ڕۆژێکە ئێران هەڕەشەی تووند لە ئیسرائیل دەکات و دوێنێش ماوەی 48 کاتژمێری بۆ تۆڵەکردنەوە دیاری کرد.

لێدوانی فەرمی؛ ژەنەراڵ یەحیا ڕەحیم سەفەوی، یاریدەدەر و ڕاوێژکاری عەلی خامنەیی، ڕێبەری باڵای ئێران دەڵێت: "ئیسرائیل ترسی هەیە لە تۆڵەسەندنەوە و شەقی چاوەڕوانکراوی ئێران، ئەمەش وا دەکات هەست بە پەشیمانی بکەن لە دەستدرێژی بۆ سەر باڵیۆزخانەی ئێران لە دیمەشق".

زانیاریی زیاتر: ژەنەراڵ یەحیا ڕەحیم پێیوایە "ئەم شەڕە دەروونی و سیاسی و میدیاییە بۆ ئیسرائیل لە خودی شەڕەکە ترسناکترە، بەشێک لە بەرپرسانیان بەناچاری هەڵاتوون و بەشێکی دیکەشیان لە ترسی هێرشەکانی ئێران شەوانە لە پەناگەدا دەخەون".