ڕووداوەکانی ڤەنزوێلا بەهای نەوتی کوردستان و عێراق دادەبەزێنێت؟

ئاڤا نیوز

شارەزایەکی ئابووری لە عێراق دەڵێت، هەرچەندە ڕووداوەکانی ڤەنزوێلا  لە ماوەی کورتخایەندا کاریگەرییەکی سنوورداری لەسەر نرخی نەوت دەبێت و بەهۆیەوە بەهای نەوت بەرزدەبێتەوە، بەڵام ئەگەر ئەمریکا هەژموونیی بەسەر کەرتی نەوتی ئەو وڵاتەدا بسەپێنێت و هەناردەی نەوتی وڵاتەکە زیادببێت، نرخی نەوت بۆ خوار 55 دۆلار دادەبەزێت.

ئەوەی پێویستە بیزانیت: ئەمڕۆ شەممە، ڤەنزوێلا کەوتە ناو تەمومژاویترین قۆناغی سیاسی خۆی لە مێژووی هاوچەرخدا. دوای زنجیرەیەک هێرشی ئاسمانی و مووشەکیی سوپای ئەمریکا بۆ سەر شاری کاراکاسی پایتەخت، دۆناڵد ترەمپ، سەرۆکی ئەمریکا ڕایگەیاند کە هێزە تایبەتەکانیان، نیکۆلاس مادۆرۆ سەرۆکی ڤەنزوێلا و هاوژینەکەیان دەستگیرکرد و بەرەو دەرەوەی وڵاتەکەیان گواستوونەتەوە.

لێدوانی فەرمی: نەبیل مەرسومی، شارەزای ئابووری لە عێراق شیکارییەکی کورتی خۆی بۆ ڕووداوەکانی ڤەنزوێلا و کاریگەری لەسەر کەرتی نەوتی عێراق کردووە و، ڕایگەیاند، هێرشەکەی ئەمریکا بۆسەر ڤەنزوێلا دۆلارێک بۆ دوو دۆلار بەهای نەوت بەرزدەکاتەوە و لە کورتمەودادا کاریگەرییەکەی سنووردار دەبێت. چونکە ئەو وڵاتە ڕۆژانە تەنیا 600 بۆ 800 هەزار بەرمیل هەناردە دەکات، ئەوەش لە بازاری جیهانیدا ڕێژەیەکی کەم و بچووکە.

- دەشڵێت، لەم کاتەدا لە بازارەکانی جیهان، خستنەڕووی نەوت زۆرە و خواستیش لەسەری کەمبووەتەوە، بەڵام لە درێژ مەودادا ئەگەر ئەمریکا هەژموونی بەسەر کەرتی نەوتی ڤەنزوێلادا بسەپێنێت، دەکرێت هەناردەی نەوتی ئەو وڵاتە بۆ بازارەکانی جیهان بەرزببێتەوە، ئەوەش وادەکات بەهای نەوت لە ئاستی جیهان بۆ 55 دۆلار و کەمتریش دابەزێت.