هەژماری من دەست بە سزادانی بانکە کەمتەرخەمەکان دەکات

ئاڤا نیوز

 

بەهۆی کەمتەرخەمی و خراپیی خزمەتگوزارییەوە، زیاتر لە پێنج هەزار مووچەخۆری زانکۆی سلێمانی لە بانکی (TBI)ـیەوە بۆ بانکێکی دیکەی دڵخوازی خۆیان گوازرانەوە.

 

چیرۆکی سەرەکی: سەرچاوەیەک لە پڕۆژەی "هەژماری من" بە ئاڤای ڕاگەیاند: ئەم بڕیارە دوای ئەوە هات کە مووچەخۆرانی زانکۆی سلێمانی خۆیان داوای گۆڕینی بانکەکەیان کردووە. هۆکارەکەشی بۆ ئەوە دەگەڕێتەوە کە بانکی (TBI) نەیتوانیوە خزمەتگوزاریی شایستە پێشکەش بەو ژمارە کەمەی مووچەخۆران بکات و کێشەی بەردەوامی لە سیستەمەکەیدا هەبووە.

 

گرنگترین ئەو کێشانەی ڕووبەڕووی مووچەخۆران بوونەتەوە:

• کەمیی ئامێرەکانی ڕاکێشانی پارە (ATM).

• نەبوونی پارەی پێویست لەنێو ئامێرەکاندا لە کاتی مووچەدا.

• سنوورداریی زمانی کوردی لە خزمەتگوزارییەکاندا.

• نەبوونی سەنتەرێکی وەڵامدانەوەی پەیوەندییەکان بۆ چارەسەری کێشەی فەرمانبەران.

 

تایبەتمەندییەکانی بڕیارەکە: سەرچاوەکەی "هەژماری من" جەختی کردەوە کە ئەم هەنگاوە پەیامێکی ڕوونە بۆ هەموو بانکەکان؛ هەر بانکێک نەتوانێت باشترین ئەزموون و خزمەتگوزاری بۆ فەرمانبەرانی هەرێمی کوردستان فەراهەم بکات، ڕووبەڕووی هەنگاوی هاوشێوە دەبێتەوە و مووچەخۆرانی لێ دەگوازرێتەوە.

 

ئەوەی پێویستە بیزانیت: لە ماوەی ڕابردوودا مووچەخۆران لە سلێمانی و هەولێر کێشەیان لەگەڵ بانکی (تی بی ئای) هەبوو، بەهۆی ئەوەی ئەی تی ئێمەکان کەمە و زوو پارەیان تێدا نەدەما، هەژماری من ئەو بانکەی ئاگادار کردەوە و بەڵێن درا کێشەکە چارەسەر بکات، هەروەها زۆرن ئەو مووچەخۆرانەی چەند مانگێکە هەژماری بانکییەکانیان لە (تی بی ئای) پڕکردووەتەوە و هێشتا مامەڵەکانیان نەگەڕاوەتەوە و کارتیان بۆ دروست نەکراوە.

 

باکگراوند: بانکی تی بای، تەنها بانکی سەر بە حکومەتی عێراقە و لەنێو پرۆژەی "هەژماری من"ـە، زیاتر لە 30 هەزار بەشداربوونی هەیە، بەڵام نزیکەی 20 ئامێری ڕاکێشانی پارە (ATM)ـی لە کوردستان هەیە، ئەمەش گرفتی بۆ مووچەخۆران دروست کردووە لە کاتی ڕاکێشانی مووچەکانیان.