خاوەنی زەوییەکانی پشتێنەی سەوزایی قەرەبوو دەکرێنەوە

ئاڤا نیوز

بەڕێوەبەرایەتی گشتیی کشتوکاڵی هەولێر ئامادەکاری دەکات بۆ قەرەبووکردنەوەی ئەو کەسانەی کە زەوییەکانیان بەر قۆناغی یەکەمی پڕۆژەی پشتێنەی سەوزایی کەوتووە و لە داهاتوویەكی نزیکدا پرۆسەکە دەست پێ دەکات.

وێنە گەورەکە: پشتێنەی سەوزایی هەولێر یەکێکە لە پڕۆژە ستراتیژییەکانی حکومەتی هەرێمی کوردستان، بە چارەسەرێکی گونجاو بۆ کەمکردنەوەی دیاردەی خۆڵبارین و بەرزکردنەوەی ڕێژەی سەوزایی دادەنرێت، لەو پڕۆژەیە ملیۆنان دار دەچێندرێن، لەگەڵ ئەوەشدا چەندین پۆندی گلدانەوەی ئاو دروست دەکرێن.

ئەوەی پێویستە بیزانیت: لە جێبەجێکردنی پڕۆژەی پشتێنەی سەوزایی هەولێر، بەشێک لە زەوی، کارگە و کۆگای هاونیشتمانیان کەوتنە بەر پڕۆژەکە، دوای خەمڵاندنی بەڕێوەبەرایەتیی گشتیی کشتوکاڵی هەولێر، ئەو کەسانەی زەوییان بەر کەوتووە بە زەوی ئەوانەی دامەزراوەیان بەر کەوتووە بە پارە قەرەبوو دەکرێنەوە.

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤای گوت، "نەخشەی کەرتی زەوییەکانیان لە شارەوانی جیا دەکرێتەوە، زەوییەکان لە کەرتی 48 ـی بەحرکە دابین دەکرێت، ئەو زەوییانەی موڵکن بە 12%ـی ڕووبەری زەوی و ئەو زەوییانەی گرێبەستن بە 3% قەرەبوو دەکرێنەوە."

بڕیارە لە لە داهاتوویەكی نزیک پرۆسەی قەرەبووکردنەوەکە دەست پێ دەکات 126 کەس لە قۆناغی یەکەم قەرەبوو دەکرێنەوە.