پەیامی تووندی نێوان ئێران و ئیسرائیل لە کۆبوونەوەی ئەنجوومەنی ئاسایش

ئاڤا نیوز

لە دانیشتنی ئەنجوومەنی ئاسایشی نەتەوەیەکگرتووەکان تایبەت بە هێرشی ئێران بۆ سەر ئیسرائیل، باڵیۆزانی ئیران و ئیسرائیل بەتووندی وەڵامی یەکتریان دایەوە.

لێدوانی فەرمی: ئەمیر سەعید ئیروانی، باڵیۆزی ئێران گوتی: ئێران زۆر بە دانبەخۆداگرتنەوە ئەم هێرشەی کردووە، ئەمەش لەسەر بنەمای جێبەجێکردنی مافی بەرگریکردن لە خۆی بووە. گوتیشی: "ئەم ڕژێمە تیرۆریستە بەرپرسیاری هەموو ئەو کردە تاوانکاری و تیرۆریستییانەیە کە دژی ئێران کراون و دەبێت بەرپرسیارێتیی لێکەوتەکانیشی بگرێتە ئەستۆ."

 

بۆچوونی بەرامبەر: گیلاد ئیردان، باڵیۆزی ئیسرائیل حکومەتی ئیرانی بە هیتلەری نازی بەراورد کرد و داوای لە ئەنجوومەنی ئاسایش کرد هەنگاوی کۆنکرێتی لە دژی ئێران بگرێتەبەر.  گوتیشی "ڕژێمی ئیسلامی ئەمڕۆ هیچ جیاوازییەکی لەگەڵ ڕایشی سێیەم نییە و خامنەیش هیچ جیاوازییەکی لەگەڵ ئەدۆڵف هیتلەر نییە."

 

باکگراوند: دەیان ساڵە ئێران و ئیسرائیل لەگەڵ یەکدی ناکۆکن، بەڵام ئەمە یەکەمجارە گرژییەکانی نێوانیان تا ئەو ئاستە هەڵبکشێت و ئێران ڕاستەوخۆ بە درۆن و مووشەک هێرش بکاتە سەر خاکی ئیسرائیل.