ڕۆژنامەیەکی ئەمریکی زانیاری لەبارەی وەڵامی ئیسرائیل بۆ ئێران ئاشكرا دەکات

ئاڤا نیوز

ڕۆژنامەیەکی ئەمریکی ئاشکرای دەکات، ڕنگە سوپای ئیسرائیل لە ئەمڕۆ دووشەممەوە وەڵامی هێرشەکەی ئێران بداتەوە، ئێرانیش لە ترسی هێرشەکە ئامادەکاری کردووە و چەندین بنکەی سەربازی چۆڵ کردوون.

وێنە گەورەکە: ڕۆژنامەی وۆڵ ستریت جۆرناڵی ئەمریکی، بە پشتبەستن بە سەرچاوەیەکی هەواڵگریی ئیسرائیلی بڵاوی کردووەتەوە، ڕەنگە ئیسرائیل لە ئەمڕۆ دووشەممەوە وەڵامی هێرشەکەی ئێران بداتەوە، ڕەنگە هێرشی سەربازییش لەخۆبگرێت.

لێدوانی فەرمی: ڕۆژنامەکە لە زاری پیتەر لێرنەر، گوتەبێژی سوپای ئیسرائیلەوە ڕایگەیاندووە، “بەرپرسانی سەربازی کۆمەڵێک بژاردەیان پێشکەش بە حکومەت کردووە بۆ وەڵامدانەوەی هێرشەکەی ئێران”.

زانیاریی زیاتر: ڕۆژنامەکە ئاماژەی بەوە کردووە "حکومەتی ئیسرائیل ئەمڕۆ یان لە ڕۆژانی داهاتوودا هەنگاوەکانی خۆی دیاری دەکات. ئیسرائیل چەند ناوەندێكی سەربازی و هەواڵگری و سەكۆی مووشەكی و بنكەی سەربازیی ئێران دەکاتە ئامانج، ئێرانیش ئامادەکاری کردووە و چەندین بنكەی سەربازی چۆڵ كردوون.

ئەوەی پێویستە بیزانیت: جۆ بایدن، سەرۆکی ئەمریکا داوای لە ئیسرائیل کردووە پەلە نەکات لە پرسی وەڵامدانەوەی ئێران، هەروەها ئەمریکا بە ڕاشکاوی ڕایگەیاندووە بەشداری لە هیچ هێرشێکی ڕاستەوخۆ بۆ سەر ئێران ناکات.