75 ساڵە باران بەم ڕێژە زۆرەی دوێنێ لە ئیمارات نەباریوە

ئاڤا نیوز

 

لە ماوەی 24 کاتژمێری ڕابردوودا، ئیمارات زۆرترین ڕێژەی بارانبارینی لە مێژوودا بەخۆیەوە بینیوە؛ کە لە 75 ساڵی ڕابردوودا بەمشێوەیە باران لە شار و شارۆچکەکانی ئیمارات نەباریوە.

 

ڕاگەیێنراوی فەرمی: سەنتەری نیشتمانی کەشناسی ئیمارات ڕایگەیاند، ئەو بڕە بارانبارینەی کە لە ماوەی 24 کاتژمێری ڕابردوودا باریوە، ڕووداوێکی مێژووییە بۆ وڵاتەکە.

 

ئەوەی پێویستە بیزانیت: تاوەکو ئێستا زۆرترین ڕێژەی بارانبارین لە ناوچەی "خەتم شکلە" لە عەین تۆمارکراوە، کە لە ماوەی کەمتر لە 24 کاتژمێردا گەیشتووەتە 254.8 ملیمەتر؛ کە لە ساڵی 1949ـەوە تاوەکو ئەمساڵیش ڕێژەیەکی زۆری باران بەمشێوەیە لە ئیمارات نەباریوە، ئەمەش بەهۆی گۆڕانکارییەکانی کەشوهەوایە، کە زەوی ڕووبەڕووی بووەتەوە. 

 

زانیاریی زیاتر: تەنیا لە ڕۆژی ڕابردوو سێشەممە و لە ماوەی تەنیا 12 کاتژمێردا نزیکەی 100 ملیمەتر باران باریوە، کە ئەم ڕێژەیە نزیکە لەوەی دوبەی لە ساڵێکدا تۆماری دەکات.

 

ئەوەی پێشبینی دەکرێت: بەپێی سەنتەری نیشتمانی کەشناسی ئیمارات پێشبینی دەکرێت لە کاتژمێرەکانی داهاتوودا بڕێکی زۆرتر باران ببارێت.