وەزارەتی دارایی: کێشەی مووچە بەتەواویی چارەسەرکراوە

ئاڤا نیوز

 

گوتەبێژی وەزارەتی دارایی و ئابووریی حکومەتی هەرێمی کوردستان ڕایگەیاند، کێشەی مووچە بەتەواوەیی چارەسەرکراوە، ئەوەش دوای ڕێككەوتنی سەرۆكوەزیران بارزانی و محەممەد شیاع سوودانی سەرۆكوەزیرانی عێراق.

لێدوانی فەرمی: هونەر جەمال، گوتەبێژی وەزارەتی دارایی حکومەتی هەرێمی کوردستان لە كۆنگرەیەكی ڕۆژنامەوانیدا ڕایگەیاند: بەتەواوەتی پرسی مووچە چارەسەر کراوە، ئەمەش لە سەردانەکەی ئەم هەفتەیەی محەممەد شیاع سوودانی، سەرۆکوەزیرانی عێراق بۆ ئەمریکا جەختی لێکرایەوە، بابەتی مووچەی فەرمانبەرانی هەرێمی کوردستانیش چارەسەر بووە و پرسی مووچە چیدیکە نابێتە گرفت، چونکە مافێکی بنەڕەتی مووچەخۆرانی هەرێمی کوردستانە.

وێنە گەورەکە: دوای ڕێککەوتنی سەرۆکوەزیران بارزانی و محەممەد شیاع سوودانی سەرۆكوەزیرانی عێراق، بڕیارە لەمەودوا مووچە لە سەرجەم کێشەکان جیابکرێتەوە و مانگانە لە کاتی خۆیدا بنێردرێت.

ئەوەی پێویستە بیزانیت: هەفتەی داهاتوو دابەشکردنی مووچە لە عێراق دەستپێدەکات و وەزارەتی دارایی حکومەتی هەرێمی کوردستان تا ئەو کاتە هەموو ئامادەکارییەک دەکات، بۆ ئەوەی لیستی مووچەی مووچەخۆران ڕەوانەی بەغدا بکات.