ئەڵمانیا سێ کەس بە تۆمەتی سیخوڕی بۆ چین دەستگیر دەکات

ئاڤا نیوز

ئەڵمانیا سێ کەس  بە تۆمەتی کارکردن لەگەڵ دەزگای هەواڵگریی چین و پێدانی زانیاری تەکنەلۆژی بەو وڵاتە دەستگیر دەكات. وەزیری ناوخۆی ئەڵمانیاش دەڵێت "هەواڵگریی چین مەترسی دروست كردووە".

چیرۆکی سەرەکی: هێزە ئەمنییەکانی ئەڵمانیا سێ هاووڵاتی وڵاتەکەیان بە تۆمەتی کاری سیخوڕی و کارکردن لەگەڵ دەزگای هەواڵگریی چین و پێدانی زانیاریی تەکنەلۆژی بە حکومەتی پەکین دەستگیر کرد؛ زانیارییە تەکنەلۆژییەکان تایبەت بوونە بە بواری سەربازی.

گۆشەیەکی دیکەی دیمەنەکە: دەستگیرکردنی ئەو ئەڵمانییانە تەنیا دوای یەک هەفتە لە سەردانی ئۆلاف شۆڵز ـ ڕاوێژکاری ئەڵمانیا بۆ پەکین دێت کە ئامانج لێی دروستکردنی پاڵەپەستۆ بووە لەسەر بەرپرسانی چین تا پشتیوانییەکانیان بۆ ڕووسیا ڕابگرن. 

لێدوانی فەرمیی: نانسی فایسەر ـ وەزیری ناوخۆی ئەڵمانیا ڕایگەیاند: حکومەت بە وردی چاودێریی ئەو مەترسییانە دەکات کە وەک خۆیان دەڵێن لە لایەن  هەواڵگریی چینەوە دروست کراون بە تایبەت لە بواری بازرگانی، پیشەسازی و زانستی.

زانیاریی زیاتر: بە گوێرەی زانیارییەکان، تۆمەتبارەکان لە کاتی دەستگیرکردنیان، خەریکی گفتوگۆ بوون لەبارەی پڕۆژەیەکی توێژینەوە کە دەتوانرا بۆ فراوانکردنی توانای سەربازی ـ دەریایی چین سوودی لێوەربگیردرێت.

گۆشەیەکی دیکە: هەفتەی ڕابردوو هێزە ئەمنییەکانی ئەڵمانیا، دوو هاووڵاتی ئەڵمانی بە ڕەگەز ڕووسییان بە تۆمەتی سیخوڕی بۆ مۆسکۆ دەستگیر کرد.