ئێران هێزەكانی لە سووریا دەكشێنێتەوە و هێزی دیكە جێگەیان دەگرنەوە

ئاڤا نیوز

ئێران بۆ ئەوەی گرژییەکانی لەگەڵ ئیسرائیل کەم بکاتەوە، بەشێک لە هێزەکانی لە سووریا دەکشێنێتەوە و گرووپەکانی نزیک لێی کە بەشێکیان عێراقین جێگەیان دەگرنەوە.

وێنە گەورەکە: بەهۆی بەردەوامی هێرشەکانی ئیسرائیل و بەتایبەتیش هێرشەکەی ئەم دواییەی سەر کۆنسوڵخانەی ئێران لە دیمەشق، تاران هێزەکانی لە سووریا دەکشێنێتەوە.

زانیاریی زیاتر: بەگوتەی سەرچاوە ئێرانییەکان،  ئێران بارەگای هێزەکانی لەو هێڵەی لەنێوان دیمەشق تا جۆلانە چۆڵکردووە، چەکداری لوبنانی و عێراقی جێگەی هێزەکانی ئێرانیان گرتووەتەوە.

لە لایەکی دیکەوە: سەرچاوەیەک لە حزبوڵڵای لوبنان بە فرانس پرێسی گوتووە:" لەهەفتەکانی ڕابردوودا ئێران لە ناوچەکانی باشووری سووریا کشاوەتەوە، هەروەها بارەگاکانی لە ریفی دیمەشق، دەرعاو قونەیتەرە کشاندووەتەوە".

ئەوەی پێویستە بیزانیت: ئێستا ئێران تەنیا نووسینگەیەکی لە دیمەشق ماوەتەوەو و کۆبوونەوەو پەیوەندییەکانیان لەگەڵ حکومەتی سووریاو گرووپە چەکدارەکان لەو ڕێگەیەوە دەبێت.