شا سەلمان نەخۆشخانەی جێهێشت

ئاڤا نیوز

شا سەلمان عەبدولعەزیز، شای سعوودیە، کە بە هۆی نەخۆشییەوە لە نەخۆشخانە خەوێنرابوو، نەخۆشخانەی بەجێهێشت.

چیرۆکی سەرەکی: شا سەلمان لە نەخۆشخانەی پسپۆڕیی شا فەیسەڵ لە جەددە خەوێنرا بوو. دوای وەرگرتنی چارەسەری پێویست نەخۆشخانەی بەجێهشت. 

ئەوەی پێویستە بیزانیت: شا سەلمانی تەمەن 88 ساڵ، ساڵی 2020 نەشتەرگەریی میزەڵدانی بۆ کرا و مانگی ئایاری 2022 لە بەر چارەسەری کۆڵۆن چووبووە ژێر چاودێریی پزیشک.

باکگراوند: شا سەلمان حەوتەم شای سعوودیەیە، جگە لەوەی دەسەڵاتی سەرۆکوەزیرانی هەیە فەرماندەی گشتی هێزە چەکدارەکانی سعوودیەشە، لە ساڵی 1935 لە ڕیاز لەدایکبووە و لە ساڵی 2015 ەوە لەدوای مردنی شا عەبدوڵڵا بووەتە شای سعوودیە.

وێنە گەورەکە: سیستەمی پاشایەتی لە سعوودیە پشتاوپشتە، واتە تا پاشایەک لە ژیاندا بمێنێت پاشایەکی دیکە جێگەی ناگرێتەوە، شا سەلمانیش دوای مردنی براکەی بووە پاشای سعوودیە.