هەڕەشەی هەڵوەشاندنەوەی دەم پارتی دەکرێت

ئاڤا نیوز

لە دوای هەڵبژاردنەکانی 31ـی ئادار، هەڕەشەکان لەسەر دەم پارتی زیادیان کردووە و ئەو پارتە بە نزیک لە پەکەکە تۆمەتبار دەکرێت.

 

وێنە گەورەکە: چەند ڕۆژێکە ئەو پارتە بە لابردنی ئاڵا و سیمبولەکانی تورکیا لەو شارەوانییانەی بەدەستیان ‌هێناوە، تۆمەتبار دەکرێت و چەند لایەنێکیش داوای هەڵوەشاندنەوەی دەکەن.

 

لێدوانی فەرمی: یەڵماز تونج، وەزیری دادی تورکیا ڕایگەیاند: "پێشتر هەدەپە و ئێستاش دەم پارتی نەیانتوانیوە خۆیان لە پەکەکە بەدوور بگرن، بۆیە پێویستە خۆی بە دوور بگرێت ئەگەرنا پارتەکە هەڵدەوەشێنرێتەوە".

 

بۆچوونی لایەنی بەرامبەر: تونجەر باکرهان، هاوسەرۆکی دەم پارتی ڕایگەیاند: "کەسانێک لەرێگەی ورووژاندنی هەستی  خەڵک، هەوڵ دەدەن گەندەڵی و تاڵانکارییەکانیان بشارنەوە".

باکگراوند: تاوەکو ئێستا لە تورکیا حەوت پارت بە بڕیاری دادگە داخراون و دوو پارتیش خۆیان هەڵوەشاندووەتەوە.