ئیسرائیل: ئەردۆغان خەون بە دەوڵەتی عوسمانییەوە دەبینێت

ئاڤا نیوز 

وەزیری دەرەوەی ئیسرائیل، دەڵێت "ئەردۆغان خەون بە سەرکردایەتیی دەوڵەتی ئیسلامی و  درووستکردنی دەوڵەتی عوسمانییەوە دەبینێت".

ئەوەی پێویستە بیزانیت: ئەو گوتانەی وەزیری دەرەوەی ئیسرائیل کاردانەوە بوون بەرامبەر لێدوانێکی ڕەجەب تەیب ئەردۆغان سەرۆککۆماری تورکیا کە گوتبووی "لەگەڵ ئیسرائیل پەیوەندییە بازرگانییەکانمان بەرەو کۆتایی دەچێت، جگە لەوەش سەرجەم پەیوەندییەکانی دیکەمان پچڕاندوە و دەیپچرێنین".

هۆکارە زانراوەکان: "سەپاندنی سزای ئابووری، پچڕاندنی پەیوەندییەکان و پشتییوانییە بەردەوامەکانی تورکیا بۆ فەلەستین و ناوهێنانی قودس لە دژی ئیسرائیل،  هۆکارێکن بۆ گرژبوونی پەیوەندییەکانی نێوان ئیسرائیل و تورکیا".

لێدوانی فەرمی: ئیسرائیل کاتز، وەزیری دەرەوەی ئیسرائیل بە تورکی لە تۆڕی کۆمەڵایەتی ئێکس نووسیویەتی: ئیسرائیل ئیمپراتۆریەتێکی خاچپەرست نییە و قودسی پایتەختی ئیسرائیل قوستەنتینیە نییە، قودس بۆ هەمیشە وەک پایتەختی جووەکان دەمێنێتەوە.

بۆچوونی لایەنی بەرامبەر: وەزارەتی دەرەوەی تورکیا وەڵامی کاتزی دایەوە و ڕایگەیاند: بەئامانجکردنی سەرۆکەکەمان دۆخی دەروونی حکومەتەکەی ئیسرائیل نیشان دەدات، تورکیا بێدەنگ نابێت لە ستەم و کۆمەڵکوژییەکانی ئیسرائیل تا هەموو حکومەتەکەی نەتەنیاهۆ دەگەن بە سزای خۆیان.

وێنە گەورەکە: تورکیا دوای سەپاندنی سزای ئابووری، هەموو پەیوەندییەکانی لەگەڵ ئیسرائیل پچڕاندووە، بەتایبەت دوای حەوتی ئۆکتۆبەر و هێرشە بەردەوامەکانی ئیسرائیل لە غەززە.