گوتەبێژی وەزارەتی دارایی: لەگەڵ ناردنی پارە لە بەغداوە دەست بە دابەشکردنی مووچە دەکەین

ئاڤا نیوز

 

گوتەبێژی وەزارەتی دارایی و ئابووریی هەرێمی کوردستان ڕایدەگەیێنێت، ئەوەی لەسەر ئێمە بووە جێبەجێمان کردووە و چاوەڕوانی ناردنی پارەی مانگی چوارین لە بەغداوە، لەبارەی پلەبەرزکردنەوەش دەڵێت، بەشێکی وەزارەتەکان ڕێکارەکانی پلەبەرزکردنەوەیان تەواو کردووە. 

 

بۆچی گرنگە: بۆ ئەوەی کێشە بۆ مووچە دروست نەبێت، حکومەتی هەرێمی کوردستان بڕیاری داوە داهاتە فیدراڵییەكان ڕادەستی حكومەتی عێراق بکات، بۆ ئەم مەبەستەش "هەموو ئامادەكارییەک كراوە".

 

لێدوانی فەرمی: هونەر جەمال، گوتەبێژی وەزارەتی دارایی و ئابووریی هەرێمی کوردستان بە ئاڤا نیوزی ڕاگەیاند: ئێستا ئێمە چاوەڕوانی وەزارەتی دارایی عێراقین پارەی مووچەی مانگی چوارمان بۆ بنێرێت، بۆ ئەوەی دەست بە دابەشكردنی مووچە بكەین.

 

لەلایەکی دیکەوە: لەبارەی هەژماری من گوتەبێژی وەزارەتی دارایی دەڵێت: سیستمێكی پێشكەوتووە هیچ گرفتێكی یاسایی نییە و بانكەكانی بەشدار مۆڵەتیان لە بانكی ناوەندیی عێراق وەرگرتووە و چاوەڕوانین دادگەی فیدراڵی لەسەر ئەو پرسە بەرچاوڕوونی بدات.

 

زانیاریی زیاتر: بەشێک لە وەزارەتەکان ڕێکارەکانی  پلەبەرزکردنەوەی فەرمانبەرانیان تەواو کردووە، ئێستا بۆ دابینکردنی شایستەی دارایی پلەبەرزکردنەوەش لەگەڵ عێراق گفتوگۆ دەكرێت.