ئاڤا نیوز کەیسێکی گەندەڵی لە کەمپینێکی خێرخوازی ئاشکرا دەکات

ئاڤا نیوز

لە ئاکرێ کەمپینێکی خێرخوازی بۆ کۆکردنەوەی پارە بۆ هەژاران و کەمدەرامەتان ڕێکخراوە، بەڵام بڕێک لە پارەکە دیار نەماوە، بەو هۆیەوە دوو ئەندامی کەمپینەکە دەستبەسەرکراون.

چیرۆکی سەرەکی: لە مانگی ڕەمەزاندا چەند کەسێک کەمپینێکیان دوور لە چاودێری لایەنی پەیوەندیدار ڕێکخستبوو، پارەیان لە خەڵک و کەسانی دەوڵەمەند و سەرمایەدار وەرگرتووە بە مەبەستی کڕینی جلوبەرگی جەژن بۆ کەمدەرامەتان و هەژاران.

زانیاریی بەدەستهاتوو: بەپێی زانیارییەكانی ئاڤا نیوز، لە کەمپینەکەدا نزیکەی 40 ملیۆن دینار دیار نەماوە بەبێ ئەوەی بدرێت بە کەسانی پێویست یان کڕینی پێداویستی جەژن بۆیان، لەسەر ئەو بڕە پارەیەش لەنێوان سەرپەرشت و ئەندامانی کەمپینەکە کێشە دروست بووە و هەردوولا سکاڵایان لەسەر یەکتری تۆمارکردووە. 

گۆشەیەکی دیکەی دیمەنەکە: ئەنجامدەرانی کەمپینەکە هەر لە مانگی ڕەمەزاندا دەچنە لای ژنێکی کەم دەرامەت و پێكەوە لایڤێکی تۆڕە کۆمەڵایەتییەکان دەکەنەوە بۆ ئەوەی هاوکاری بۆ کۆبکرێتەوە، خەڵکیش دوو ملیۆن دیناریان پێداوە، بەڵام تەنیا 100 هەزار دیناریان داوە بە ژنەكە، دوای ئەمەش ژنەکە سکاڵای تۆمارکردووە و دوو کەس لە ئەندامانی کەمپینەکە دەستگیرکراون.