نەتەوە یەکگرتووەکان: 70%ـی ڕۆژنامەنووسانی ژینگە ڕووبەڕووی هێرش و هەڕەشە بوونەتەوە

ئاڤا نیوز

 

بە گوێرەی داتاکانی ئاژانسی یونسکۆی نەتەوە یەکگرتووەکان، 70%ـی ڕۆژنامەنووسانی بواری ژینگە لە 129 وڵات ڕووبەڕووی هێرش، هەڕەشە و گوشاری پەیوەست بە کارەکەیان بوونەتەوە. 

 

وێنە گەورەکە: یونسکۆ هۆشداری دەدات لەوەی تا دێت تووندوتیژیی زیاتر دەبێت بەرامبەر بەو ڕۆژنامەنووسانەی کە سەبارەت بە ژینگە و ئاوهەوا ڕاپۆرت دەنووسن؛ بە جۆرێک لە هەر 5 ڕۆژنامەنووسی ژینگەیی 2 کەسیان ڕووبەڕووی تووندوتیژیی جەستەیی بوونەتەوە. 

 

لێدوانی فەرمی: ئاندرێی ئازۆولای، بەڕێوەبەری گشتیی یونسکۆ، ڕایگەیاند، ڕۆڵی ڕۆژنامەنووسان لە چارەسەری قەیرانە ژینگەییەکان گرنگە و "بەبێ زانیاریی زانستیی متمانەدار سەبارەت بەوەی کە لە قەیرانە ژینگەییەکاندا چی ڕوودەدات، ناتوانین ئومێدمان بە سەرکەوتن بەسەر ئەو قەیرانە هەبێت".

 

ژمارەکان وا دەڵێن: لە نێوان ساڵانی 2009 تاوەکو 2023 لانیکەم 749 ڕۆژنامەنووسی بواری ژینگە ڕووبەڕووی 'کوشتن، تووندوتیژیی جەستەیی، دەستبەسەر و دەستگیرکردن، هەراسانکردنی ئۆنلاین و ڕووبەڕووکردنەوەی یاسا' کراونەتەوە.