عێراق لە ڕێگەی كۆمپانیایەكی ئۆكراینی گەورەترین كێڵگەی غاز پەرەپێدەدات

ئاڤا نیوز

وەزارەتی نەوتی عێراق  ڕایگەیاند، گرێبەستێکیان  لەگەڵ کۆمپانیایەکی ئۆکراینی کردووە بۆ پەرەپێدانی کێڵگەی غازی سروشتی عوکاز.

وێنە گەورەكە: عێراق بەشێكی زۆری ئەو غازەی پێویستییەتی لە ئێران دەیكڕێت، بە پەرەپێدانی كێڵگەكانی غاز دەیەوێت چیتر پێویستی بە ئێران نەبێت.

لێدوانی فەرمی: باسم محەممەد، یاریدەدەری وەزیری نەوتی عێراق بۆ کاروباری دەرهێنانی نەوت ڕایگەیاند: کۆمپانیای ئۆکرازم ڕیسۆرسی ئۆکراینی گرێبەستی پەرەپێدانی کێڵگەی غازی عوکازی لەگەڵ واژۆکراوە، بەڵگەنامەکانی بەپێی ئەو میکانیزمانەی وەزارەتی نەوت پەسەندی کردوون ئامادەکراون، سەرجەم بەڵگەنامەکانیش لەلایەن باڵیۆزخانەی ئۆکراینا و باڵیۆزخانەی عێراق لەو وڵاتە پەسەند کراون.

زانیاریی زیاتر: وەزارەتی نەوت هەندێک مەرجی بۆ ئەو کۆمپانیایە ئۆکراینییە داناوە کە پێشتر لەسەر هیچ کۆمپانیایەکی دانەناوە، ئەمە جگە لە گەرەنتی بانکیی بە بڕی 50 ملیۆن دۆلار ئەگەر  هاتوو هەر زانیارییەکی هەڵەی پێشکەشکردبوو.

باكگراوند: كێڵگەی غازی عوكاز دەكەوێتە باشووری شاری قائیم لە ڕۆژئاوای عێراق، بە گەورەترین كێڵگەی غاز لە عێراق دادەنرێت و ئاستی غازی یەدەگی بە زیاتر لە پێنج تریلیۆن پێ سێجا دەخەمڵێنرێت.