ئەندامێکی ئەنجومەنی نوێنەرانی ئەمریکا بە وەرگرتنی بەرتیل تۆمەتبار دەکرێت

ئاڤا نیوز

 

ئەندامێکی ئەنجومەنی نوێنەرانی ئەمریکا و هاوسەرەکەی بە وەرگرتنی بەرتیل لە کۆماری ئازەربایجان تۆمەتبار کران، ئەگەری هەیە دەیان ساڵ زیندانی بکرێن.

 

وێنە گەورەکە: وەزارەتی دادی ئەمریکا ڕایدەگەیێنێت، هێنری کوێلار نوێنەری دیموکراتەکان لە ئەنجومەنی نوێنەران و هاوسەرەکەی تۆمەتبارکراون بە وەرگرتنی بەرتیل بە بڕی نزیکەی 600 هەزار دۆلار.

 

زانیاریی زیاتر: باس لەوە دەکرێت پارەیان لە کۆمپانیایەکی نەوتی کۆماری ئازەربایجان و بانکێکی مەکسیکی وەرگرتووە.

 

ئەوەی پێویستە بیزانیت: ئەم نوێنەرە و هاوسەرەکەی دوای ئامادەبوونیان لەبەردەم دادگەی شاری هوستن بە بارمتەی دارایی "کەفالەت" ئازادکران.

 

لێدوانی فەرمی: هێنری کوێلار، ئەو تۆمەتانەی رەتکردەوە و گوتی: "دەمەوێت ئەوە ڕوون بکەمەوە من و هاوسەرەکەم بێتاوانین".

 

چی ڕوو دەدات: ئەگەر تۆمەتەکەیان بەسەردا ساخ بێتەوە، بۆ دەیان ساڵ سزای زیندانیکردنیان بۆ دەردەکرێت.