وەزیری دارایی عێراق بیانوویەکی دیکە بۆ نەناردنی مووچە دەهێنێتەوە

ئاڤا نیوز

 

لە دوایین داواکارییدا لەبارەی ناردنی مووچەی مووچەخۆرانی هەرێمی کوردستان، وەزیری دارایی عێراق دەگەڕێتەوە بۆ خاڵی سفر و داوای لیستی مووچە بە کاغەز دەکات.

 

وێنە گەورەکە: هەردوو حکومەتی عێراق و هەرێمی کوردستان، دوای سەردانەکەی سەرۆکوەزیران بارزانی بۆ بەغدا لێکتێگەیشتن و ڕێککەوتنیان کرد بۆ ئەوەی چیدیکە شایستە داراییەکان و مووچەی مووچەخۆرانی هەرێمی کوردستان دوانەکەوێت، بەڵام نیوەی مانگی پێنج تێپەڕیوە و هێشتا مووچەی مانگی چوار نەنێردراوە.

 

زانیارییە بەدەستهاتووەکان: تەیف سامی، وەزیری دارایی عێراق لەدوایین داواکارییدا، داوای لە وەزارەتی دارایی هەرێمی کوردستان کردووە لیستی مووچەی بە کاغەز بۆ بنێرن.

 

کاریگەری و لێکەوتەکان: وەزیری دارایی عێراق پێشتر جەختی لە بەئەلیکترۆنیکردنی مووچە دەکردەوە، ئەم داوایەی ئێستای پڕۆسەی ناردنی مووچە و شایستە داراییەکانی هەرێمی کوردستان زیاتر دوادەخات.

 

زانیاریی تایبەت: وەزارەتی دارایی هەرێمی کوردستان دوای داواکارییەکەی تەیف سامی، ڕاستەوخۆ لیستی مووچەیان بەکا‌غەز گەیاندووەتە بەغدا، ئێستا "هیچ بیانوویەک"ـی دیکەیان نەماوە.

 

لەلایەکی دیکەوە: مەسرور بارزانی، سەرۆکوەزیرانی هەرێمی کوردستان ڕایگەیاند، "هەر ئەركێک لەسەر شانی ئێمەیە وەک هەرێمی كوردستان جێبەجێمان كردووە و چاوەڕوانین بەغدا مووچەی مانگی چوار و پێنج  لە كاتێكی زوودا ڕەوانە بكات، هه‌رچی داواكاریی حكومه‌تی عێراق هه‌بووه‌، بۆ ئه‌وه‌ی كێشه‌ بۆ ناردنی مووچه‌ی خه‌ڵكی كوردستان دروست نه‌بێت، جێبه‌جێمان كردووە".