جەزائیر ڕەشنووسی ڕاگرتنی شەری غەززە پێشکەشی ئەنجوومەنی ئاسایش دەکات

ئاڤا نیوز

 

نوێنەری جەزائیر لە نەتەوە یەکگرتووەکان، ڕەشنووسێکی پەیوەست بە پرسی "وەستاندنی کوشتاری ڕەفەح"و "ڕاگرتنی شەڕ لە غەززە"، پێشکەش بە ئەنجوومەنی ئاسایش دەکات.

 

لێدوانی فەرمی: عەمار بن جامع، نوێنەری جەزائیر لە نەتەوە یەکگرتووەکان، دوای کۆبوونەوەی داخراوی ئەنجوومەنی ئاسایش، بە ڕۆژنامەنووسانی ڕاگەیاند: نیوەڕۆی ئەمڕۆ جەزائیر ڕەشنووسی بڕیارنامەیەک سەبارەت بە ڕەفەح بڵاو دەکاتەوە.

 

وێنە گەورەکە: دەقی داواکاریی ناو ڕەشنووسەکە، پرسی ڕاگرتنی شەڕ بە یەکجاری لە غەززە لەخۆ دەگرێت، بەڵام دیار نییە کە ئەو داوایەی جەزائیر پەسەند دەکرێت یاخود نا. 

 

کاردانەوەی وڵاتان لەبارەی داواکارییەکەی جەزائیر:

فو کۆنگ، نوێنەری چین لە نەتەوە یەکگرتووەکان: هیوادارین بە زووترین کات ئەم کارە بکرێت، چونکە ژیانی خەڵک لە مەترسیدایە، هیوادارم هەر لەم هەفتەیەدا دەنگدان ئەنجام بدرێت.

 

نیکۆلاس دی ڕیڤێر, نوێنەری فەڕەنسا لە نەتەوە یەکگرتووەکان: کاتی ئەوە هاتووە ئەم ئەنجوومەنە هەنگاو بنێت و بڕیارێکی نوێ پەسەند بکات،  چونکە ئەمە "مەسەلەی ژیان و مردنە".

لیندا تۆماس گرینفیڵد، باڵیۆزی ئەمریکا لە نەتەوە یەکگرتووەکان: چاودێری دۆخەکە دەکەین و دواتر وەڵاممان دەبێت.