بەهۆی وێنەیەکی ڕەئیسی، ئەمریکا نەتەوەیەکگرتووەکانی بایکۆتکرد

ئاڤا نیوز

 

بەهۆی بەرزکردنەوەی وێنەیەکی ئیبراهیم ڕەئیسی سەرۆکی کۆچکردووی ئێران، ئەمریکا بایکۆتی ڕێوڕەسمێکی نەتەوە یەکگرتووەکانی کرد. 

 

وێنە گەورەکە: ڕۆژی پێنجشەممە، 30-5-2024، بۆ ڕێزگرتن لە بیرەوەریی ئیبراهیم ڕەئیسی، سەرۆک کۆماری کۆچکردووی ئێران نەتەوە یەکگرتووەکان ڕێوڕەسمێکی رێکخستبوو کە وێنەیەکی گەورەی ئەوی لە هۆڵەکەدا هەڵواسیبوو. 

 

ڕاگەیێنراوی فەرمی: نەیت ئێڤانس، وتەبێژی نێردەی ئەمریکا لە نەتەوە یەکگرتووەکان ڕایگەیاند، ڕەئیسی لە زۆر پێشێلکاریی ترسناکی مافی مرۆڤدا ڕۆڵی هەبووە. لەوانە کوشتنی هەزاران زیندانیی سیاسی بە بێ دادگاییکردن لە ساڵی 1988، بۆیە ئەمریکا بەشداریی لەو بۆنەیەدا ناکات.

 

باکگراوەند: ڕۆژی 19-5-2024 هێلیکۆپتەری ئیبراهیم ڕەئیسی لە کاتی گەڕانەوەی بۆ تاران، بەهۆی خراپیی کەشوهەوا کەوتە خوارەوە، سەرۆککۆمار، وەزیری دەرەوە و چەند بەرپرسێکی دیکەی ئیران لەو ڕووداوەدا گیانیان لەدەست دا.