ئەنجوومەنی پارێزگای کەرکووک یەکەم کۆبوونەوەی دەکات

ئاڤا دیجیتاڵ

 

یەکەم کۆبوونەوەی ئەنجوومەنی پارێزگای کەرکووک جگە لە یەکترناسینی ئەندامەکانی هیچ گفتوگۆ و باس و خواسێکی گەرمی تێدا نابێت، چونکە بەپێی نووسراوێکیان کە ئەندامەکانی پێ ئاگادارکراوە و  وێنەیەکی دەست ئاڤا نیوز کەوتووە، یەکەم دانیشتن سەرۆک و جێگر هەڵنابژێردرێت و تەنیا کۆبوونەوەیەکی تەشریفاتی دەبێت.

 

ئەحمەد کەرکووکی، ئەندامی فراکسیۆنی یەکێتی لە ئەنجوومەنی پارێزگای کەرکووک، بە ئاڤا نیوزی ڕاگەیاند "چیدیکە پارێزگاری بەوەکالەتی کەرکووک ناتوانێت یەکەم کۆبوونەوەی ئەنجوومەنەکە دوابخات، بەپێی یاساکان ئەگەر ڕۆژی دووشەممەی هەفتەی داهاتووش کۆبوونەوەکە دوابخات پاش ئەو ڕێککەوتنە ئەنجوومەنەکە خۆی کۆدەبێتەوە و هیچ لایەنێک بۆی نییە دوای بخات".

 

بەو جوڵە سیاسییانەی تاوەکو ئێستا لایەنە براوەکانی هەڵبژاردن کردوویانە، هیچ لایەک پەلەی لە یەکلاکردنەوەی پرسی پۆستی پارێزگاری کەرکووک نییە و هەمووان چاوەڕێی زەمینەیەکی لەبار و گفتوگۆی نەرم و دەستپێشخەریی بەرامبەری دەکات، ئەمەشیان خستووەتە دوای یەکەم دانیشتنی ئەنجوومەنەکە.

 

حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک ڕایگەیاند  "تاوەکو ئێستا وەکو پارتی بۆ دابەشکردنی پۆستەکان لەگەڵ هیچ لایەنێک نەچووینەتە دانوستانەوە، چاوەڕێی یەکەم کۆبوونەوەی ئەنجوومەنەکەین و پاشان هەوڵی دانووستان و کۆبوونەوە لەگەڵ لایەنەکان دەدەین".

 

بەپێی ئەنجامی هەڵبژاردن کورد زۆرینەی ئەندامانی ئەنجوومەنی پارێزگاکە پێکدەهێنێت و پۆستی پارێزگار بەرکەوتەی ئەو دەبێت، بەڵام کورسییەکە ئەوەندە چاوی لەسەرە ڕێککەوتنی پێشوەختە نەبێت، بۆ هیچ پێکهاتەیەک هاوکێشەکە ئاسان یەکلانابێتەوە.