هەولێر و بەغدا و کۆمپانیاکان لەبارەی نەوت ڕێکدەکەون

ئاڤا نیوز

 

هەولێر و بەغدا و کۆمپانیاکان نزیکن لە ڕێککەوتن و پێشبینی دەکرێت لە یەک بۆ دوو مانگی داهاتوودا دەست بە هەناردەکردنەوەی نەوتی کوردستان بکرێتەوە.

 

وێنە گەورەکە: دوای پەسندکردنی بودجە، حکومەتی عێراق و هەرێمی کوردستان و کۆمپانیاکان  گفتوگۆی چڕیان دەستپێکردووە بۆ ڕێککەوتن و هەناردەکردنەوەی نەوت کە ساڵێک و سێ مانگە ڕاگیراوە، ئەمەش زیاتر لە 16 ملیار دۆلار زیانی لە ئابووریی عێراق داوە.

 

چیرۆکی سەرەکی: ئەمڕۆ یەکشەممە لە بەغدا هەردوو لایەن بەمەبەستی چارەسەرکردنی گرفتەکان دووجار کۆبوونەوە و بۆ ماوەی زیاتر لە 9 کاتژمێر گفتوگۆیان کرد.

 

زانیاریی تایبەت: سەرچاوەیەک لە وەزارەتی نەوتی عێراق بە ئاڤا نیوزی گوت: لێکتێگەیشتنی باش لە نێوان هەرسێ لایەن کراوە، لە ئاییندەیەکی نزیکدا ڕێککەوتن دەکرێت و لە یەک بۆ دوو مانگی داهاتوودا دەست بە پرۆسەی هەناردەکردنەوە دەکرێتەوە.

 

ئەوەی پێویستە بیزانیت: ئێستا تەنها یەک گرفت لەبەردەم پرۆسەکە ماوە و ئەوانی تر لە یاسای بودجە چارەسەر کراون، گرفتەکەش بریتییە لە شێوازی گرێبەستی کۆمپانیاکان. حکومەتی عێراق داوا دەکات گرێبەستەکان لە هاوبەشەوە بکرێنە خزمەتگوزاری، بۆ ئەمەش نزیکن لە ڕێککەوتن.