لە شەش مانگی ڕابردوودا توركیا 833 هێرشی لە هەرێمی كوردستان كردووە

ئاڤا نیوز

بەپێی ئامارێکی ڕێکخراوی "سی پی تی " ئەمریکی، لە سەرەتای ئەمساڵەوە تاوەکو مانگی شەشی 2024، سوپای تورکیا 833 هێرش و بۆردوومانی بۆسەر خاکی هەرێمی کوردستان ئەنجامداوە و هەشت کەس "شەهید" بوون.

وێنە گەورەكە: بە پاساوی بوونی گەریلاکانی پەکەکە، توركیا بە بەردەوام بە درۆن و فڕۆكەی جەنگی سنوورەكانی هەرێمی كوردستان بۆردوومان دەكات.

ژمارەکان وادەڵێن:
پارێزگای دهۆک: 365 هێرش و بۆردوومان.
پارێزگای هەولێر: 356 هێرش و بۆردوومان.
پارێزگای سلێمانی: 102 هێرش و بۆردوومان.
پارێزگای نەینەوا: 10  هێرش و بۆردوومان.

زانیاریی بەدەستهاتوو: لەماوەی دوو ڕۆژی ڕابردوودا، سوپای تورکیا 27 بۆردوومانی بۆسەر زنجیرە چیای مەتینا و گەلی ڕەشاڤا لە قەزای ئامێدی، چیای ساوێن لە بناری قەندیل، لوتکەی کوڕاشەڵ و بناری چیای کێوەڕەش لە قەزای ڕانیە، چیای جاسوسان لە قەزای پشدەر،گوندی کانی میرانی کۆماری و نزارە لە قەزای پێنجوێن ئەنجامداوە.

زیانە سەرەکییەکان: بەتەنیا لەم ساڵدا هەشت هاووڵاتی مەدەنی، بەهۆی بۆردوومان و لەشکرکێشییەکانی سوپای تورکیا بۆسەر خاکی هەرێمی كوردستان "شەهید"بوون. ئەمەش بەپێی ئامارەکەی ڕێکخراوی "سی پی تی" ئەمریکی.