سێ ملیۆن و نیو حەبی هۆشبەر لە دەروازەیەکی سنووریی عێراق دۆزراوەتەوە

ئاڤا نیوز 

 

لە دەروازەیەکی سنووریی عێراق دەستبەسەر سێ ملیۆن و 500 هەزار ماددەی کەبتاگۆنی هۆشبەردا گیراوە، كە لە نێو سندوقی سێو شاردرابوونەوە.

وێنە گەورەکە: ماددەی هۆشبەر بەشێوەیەکی بەرچاو لە عێراق بڵاوبووەتەوە، ڕۆژانە بەكارهێن و بازرگانانی ماددەكە دەستگیر دەكرێن.

هۆكارە زانراوەكان: بەهۆی هەژاری، بێکاری، بڵاوبوونەوەی گرووپە چەکدارەکان و لاوازی حکومەت و هێزە ئەمنییەکان لە سەپاندنی یاسا زیاتر ماددەكە بەكاردەهێنرێت.

ڕاگەیێنراوی فەرمی: حەسەن عەگێلی، بەرپرسی دەستەی گشتیی گومرگەکانی عێراق ڕایگەیاند: "لە ساڵی ڕابردوو دەستمان بەسەر زیاتر لە سێ ملیۆن و 500 هەزار حەبی کبتاگۆنی هۆشبەردا گرتووە لە یەکێک لە دەروازە سنورییەکان لە نێو سندوقی سێو شاردرابوونەوە".

زانیاریی زیاتر: ساڵی ڕابردوو لە سەرجەم دەروازە سنوورییەکانی عێراق، بەشی بەرەنگاربوونەوەی قاچاخ، زیاتر لە حەوت هەزار و 500 هەڵمەتی بەدواداچوونی ئەنجامداوە.

ئەوەی پێویستە بیزانیت: ساڵی ڕابردوو وەزارەتی ناوخۆی عێراق 147 هەزار و 249 تۆمەتباری ماددەکانی هۆشبەری دەستگیرکردووە.