ئاستەنگێن پێشیا پرۆژەیێ فرۆکەخانەیا دهۆکێ چنە؟

ئاڤا دیجیتال

دووبارە ماستەرپلانا فرۆکەخانەیا دهۆکێ هاتیە دانان و دیزاینێ نوی تمامبوویە و ب مەرەما پەسەندکرن و تەرخانکرنا پارێ پێدڤی داکو دەست ب کاری بهێتە کرن، ل ڤان نزیکان دێ دوبارە بۆ جڤاتا وەزیران هێتە رەوانەکرن و چ راستی بۆ ڤەگوهاستنا جهێ فرۆکخانەیێ ژی نینە.

چیرۆکا سەرەکی: ل سالا 2013ـێ دەست ب دروستکرنا فرۆکەخانەیا نێڤدەولەتییا دهۆکێ هاتبووکرن، لێ ژبەر قەیرانا دارایی ژ کاری هاتە ڕاوەستاندن، هەتا دووبارە سەرۆکوەزیران بارزانی ل سالا 2021ـێ سەرەدانا جهێ فرۆکەخانەیێ کری و لژنەیەک راسپارد بۆ تمامکرنا کارێن پێدڤی.

داخویانیا فەرمی: دیلان رەشید، پەیڤدارێ وەزارەتا ڤەگوهاستن و گەهاندنا حکومەتا هەرێما کوردستانێ بۆ ئاڤا نیوز دیارکر؛ دووبارە ماستەرپلان بۆ فرۆکخانەیێ ژ لایێ کۆمپانیا "دار الهندسە" ڤە هاتیەن ئامادەکرن، ژبەرکو ل گەل پێشڤەچوونا جیهانێ داخوازی و تایبەتمەندیێن ناڤ فرۆکخانەیێ ژی دهێنە گوهورین و گوت: ئەگەرێ گیروبوونا دیزاینی هندەک رێکارێن تەکنیکی بووینە، بۆ نموونە ڤەدیتنا هندەک جهێن شوێنواری ل سەر ئەردێ فرۆکخانەیێ، لێ ل ڤان نزیکان دێ دیزاینا نوی بۆ جڤاتا وەزیران هێتە رەوانەکرن".

دەربارەی پێشنیازا ڤەگوهاستنا جهێ فرۆکخانەیا دهۆکێ ژ سێمێلێ بۆ سنوورێ ناحیا رۆڤیا، ژێدەرەکێ ئاگەهدارێ بابەتی بۆ ئاڤا نیوز دبێژیت: داکو هەردوو پارێزگەهێن هەولێر و دهۆک مفای ژ ئەوێ فرۆکخانەیێ وەربگرن، پێشنیازەک هەبوو جهێ وێ فرۆکخانەیا دهۆک ژ سێمێلێ بۆ دەشتا دناڤبەرا رۆڤیا و گۆپال ل نزیک رویبارێ زێ بهێتە ڤەگوهاستن، لێ ئەو پێشنیاز سەر نەگرتیە.

زانیاریێن زێدەتر: ئەو کێشەیێن کو بووینە ئەگەر کارێ پرۆژەیی فرۆکەخانەیا دهۆکێ نەهێنە دەستپێکرن ئەڤەنە؛

•پشتی ماستەرپلانا نوی دیار نینە کا کیژ کۆمپانی دێ پرۆژەی بجهـ ئینیت، هەر یا بەرێ یان ژی ئێک دی، ژبەرکو کۆمپانیا بەرێ 18%ـێ یا پارەیێ پرۆژەی وەگرتبوو و تنێ 8% بجهئینابوو.

•ئێک ژ ئاریشەیێن دی کو نەهاتیە ئێکلاکرن ئەوە، دێ چەوا دیزاینێ نوی هێتە بجهئینان.

•هەروەسا هێشتا دیار نینە کۆژەمەیێ پارەیێ پێدڤی بۆ پرۆژەی دێ چەند بیت و کۆمپانیا بەرێ دێ بجهئینیت یان کۆمپانیەکا دی.

بۆچی گرنگە: پارێزگەها دهۆکێ خالەکا گرنگە د ناڤبەرا هەرێما کوردستان و ولاتێن تورکیا و سووریا دا، لڤینەکا بازرگانیا مەزن لسەرە و زێدەبوونا بەردەواما ئاکنجیبوونا ژی هەیە، ب تمام بوونا فرۆکەخانەیا نێڤدەولەتییا دهۆکێ، دێ گەشەیەکا زێدەتر یا بازرگانی بخۆڤە بینیت.

باکگراوند: ل ڕۆژا 24-12-2012، بەرێ بناغەی بۆ پرۆژەیێ دروستکرنا فرۆکەخانەیا نێڤدەولەتییا دهۆکێ هاتبوو دانان، بڕیاربوو ب کۆژمێ نێزیکی 500 ملیۆن دۆلاران ل هەیڤا هەشت یا سالا 2015 تمام ببیت، لێ ژبەر شەرێ داعش و پەیدابوونا قەیرانا دارایی کارکرن تێدا هاتبوو ڕاگرتن.

ل ڕۆژا 21-9-2021، مەسرور بارزانی، سەرۆكێ حكومەتا هەرێما كوردستانێ، سەرەدانا وی پرۆژەی كر و گوت: "پێدڤیە دووبارە دەست ب کارکرنێ د پرۆژەی دا بهێتە کرن".