هاتووچۆی هەولێر و سلێمانی هۆشداری دەدەن

ئاڤا نیوز 

لە دوو ڕاگەیێنراوی فەرمی و جیاوازدا، هەردوو بەڕێوەبەرایەتیی هاتووچۆی هەولێر و سلێمانی هۆشداریی لەبارەی بەستنی فلاشەر بۆ ئۆتۆمبێلی تایبەت دەدەن.

وێنە گەورەکە: بەشێک لە شۆفێران فلاشەری پۆلیس بۆ ئۆتۆمبێلەکانیان دەبەستن، بەڕێوەبەرایەتیی هاتووچۆی هەولێر و سلێمانی بۆ ڕێگریکردن لەم دیاردەیە هۆشداریی دەدەنە هاووڵاتییان کە  سەرپێچیکاران ڕووبەڕووی سزا دەبنەوە.

ڕاگەیێنراوی فەرمی: ڕاگەیاندنی هاتووچۆی هەولێر ڕایگەیاند: ئاگاداری سەرجەم شوفێران دەکەینەوە کەوا بەستنی فلاشەر (نەشرە) قەدەغەیە بۆهەموو ئۆتۆمبێلێکێ تایبەت و هەر دامودەزگایەک و پێشانگەکانی جوانکاری ئۆتۆمبێل نابێت ئەم فلاشەرە بۆ هیچ ئۆتۆمبێلێک ببەستن وهەر شوفێرێک ئەم کارە بکات ئۆتۆمبێلەکەی دەستی بەسەر دادەگیرێت.

لە لایەکی دیکەوە: بەڕێوەبەرایەتی هاتووچۆی سلێمانی ڕایگەیاند: ئاگاداری سەرجەم شۆفێران دەکەین کە بەهیچ شێوەیەک فلاشەری پۆلیسی لە ئۆتۆمبێلەکانیان نەبەستن لەبەر ئەوەی قەدەغەیە و لە مەفرەزەکانی هاتووچۆدا لێپێچینەوە لەکەسی سەرپێچیکار دەکرێت و ڕووبەڕووی سزای یاسایی دەکرێتەوە.

ئەوەی پێویستە بیزانیت: ئەو جۆرە فلاشەرانە تەنیا بۆ ئۆتۆمبێلەکانی تایبەت بە پۆلیس و هێزەکانی ئاسایشی ناوخۆ و هێزە تایبەتەکانی وەزارەتی ناوخۆ دەبێت.