پلاسخارت لە ئەنجوومەنی ئاسایش داوا دەكات مووچە بۆ هەرێمی كوردستان بنێردرێت

ئاڤا دیجیتاڵ

 

 نوێنەری تایبەتی سکرتێری نەتەوەیەکگرتووەکان لە عێراق، لە كۆبوونەوەی ئەنجوومەنی ئاسایشی نێودەوڵەتی داوای كرد عێراق مووچە و شایستەداراییەکان بۆ فەرمانبەران و خەڵکی هەرێمی كوردستان بنێرێت.

 

بۆچی گرنگە: باسکردنی پرسی مووچە و شایستە داراییەکانی هەرێمی کوردستان کە کێشەیەکی سەرەکی و بەردەوامی نێوان هەولێر و بەغدایە، پشتیوانی نێودەوڵەتی بۆ هەرێمی کوردستان  بەدەستدەهێنێت و دەبێتە فشار لەسەر حکومەتی عێراق بۆ چارەسەرکردنی کێشەکە.

لێدوانی فەرمی: جێنین پلاسخارت، نوێنەری تایبەتی سکرتێری گشتیی نەتەوەیەکگرتووەکان لە عێراق، لە کۆبوونەوەی ئەنجوومەنی ئاسایشی نێودەوڵەتی باسی هەرێمی کوردستانی کرد و ڕایگەیاند:

 

• - دەبێت پارە بۆ هەرێمی کوردستان بنێردرێت تاوەکو مانگانە مووچەی فەرمانبەرانی پێ دابەش بکات.
  
  
• - دەبێت چارەسەرێکی جێگیر بۆ پرسی مووچە و بوجەی هەرێمی کوردستان بکرێت.  ئەو پارەیەی حکومەتی عێراق بۆی دیاریکراوە بیداتە هەرێمی کوردستان بۆ مووچەی خەڵک، کە ئامانجی نەتەوەیەکگرتووەکانە ئەم کێشەیە چارەسەر بکرێت.
•  
• - هەڵبژاردنەکانی هەرێمی کوردستان دواخراون، ئێستا کار لەسەر ڕێککەوتنێک دەکرێت  هەڵبژاردن بکرێت. دواخستنی هەڵبژاردنەکانی هەرێمی کوردستان باش نییە بۆ سەقامگیریی عێراق.
  
  - دۆخی پەیوەندییە ئابووریەکانی نێوان هەرێمی کورستان و عێراق لە ئاستێکی خراپدایە و دەبێت رێکخستنێکی باشی بۆ بکرێت.
  
  

 - دەبێت هەوڵبدەین لایەنە سیاسسییەکانی عێراق بتوانن پێکەوە کۆببنەوە و قسە لەسەر دۆخەکە بکەن و کاری سیاسی بکەن. تەنها ئەوان دەتوانن عێراقییەکان بەڕێوەببەن.

- ژیانێکی باشتر لە عێراق پێویستی بە کاری زیاتر هەیە و حکومەت پێویستی بە پشتیوانی هەیە، کاتی دەوێت بۆ ئەوەی کێشەکان باسبکەن و چارەسەریان بکەن.

 

لەلایەكی دیكەوە: لە دانیشتنەكەدا نوێنەری فەڕەنسا باسی هەرێمی کوردستانی کرد و ڕایگەیاند:

 

• - فەڕەنسا دەیەوێت بەزووترین كات هەڵبژاردن لە هەرێمی كوردستان بكرێت.
  
  - داوای دیالۆگ دەكەین لە نێوان عێراق و هەرێمی كوردستان لەبارەی بودجەوە.

- ئارامی و ئاسایشی هەرێمی كوردستان و عێراقمان لا گرنگە و بە تووندی سەركۆنەی هێرشەكانی سەر هەولێر دەكەین و دەبێت بوەستێنرێن.

 

 باكگراوند: ئەمڕۆ ئەنجوومەنی ئاسایشی نێودەوڵەتیی دانیشتنێكی ڕێكخست كە بەشێكی تایبەت بوو بە دۆخی عێراق ، جێنین پلاسخارت لە دانیشتنەكەدا لەبارەی دۆخی عێراق گوتەیەكی پێشكەش كرد.