وەزارەتی ناوخۆ هۆشداری بە بەکارهێنەرانی تیکتۆک دەدات

ئاڤا نیوز

وەزارەتی ناوخۆ هۆشداری دەدات لەوەی هەر کەسێک بە چەکی بێ مۆڵەت لە تیکتۆک و تۆڕە کۆمەڵایەتییەکان دەربکەوێ، داواکاری گشتی سکاڵای لەسەر تۆمار دەکات.

وێنە گەورەکە: بەگوێرەی ماددەی 15 لە یاسای ژمارە 2ی ساڵی 2022، لەگەڵ بەرکاربوونی یاسای چەک، دوو مانگ بۆ تۆمارکردنی چەکی هاووڵاتیان درێژکرایەوە.

لێدوانی فەرمی: د.هێمن میرانی، بەڕێوەبەری گشتیی دیوان لە وەزارەتی ناوخۆ بە ئاڤا نیوزی گوت: بە سەدان کەس لەسەر ئەوەی چەکی بێ مۆڵەتیان لابووە، پێبژارندی دارایی (غەرامە) و بەندکراون و کەیسەکانیان لای دادگایە.

بابەتی سەرەکی: هێمن میرانی جەختی کردەوە، هەر کەسێک ڤیدیۆی تەقەکردن لە تیکتۆک و تۆڕە کۆمەڵایەتییەکانی دیکە بڵاو بکاتەوە، لە لایەن داواکاری گشتی سکاڵای لەسەر تۆمار دەکرێت و دەدرێتە دادگا. 

لەلایەکی دیکەوە: ئەو بازاڕانەی مامەڵەی چەکیان تێدا دەکرا، لە لایەن وەزارەتی ناوخۆ داخران.

ئەوەش بزانە: وەزارەتی ناوخۆ لەپێناو ڕێگریکردن لە بوونی بازاڕی نایاسایی جۆراوجۆری چەک، ئێستا پڕۆژەیەکی هاوبەش لە نێوان کەرتی گشتی و تایبەت لە شارەکانی هەولێر و دهۆک و سلێمانی جێبەجێ دەکات، تا سێ بازاڕی هاوچەرخ کە بە سیستەمی ئەلیکترۆنی کۆنتڕۆڵ دەکرێن دروست بکرێن.