لەبارەی تەوتین هۆشداری تووند بە بانکی ڕافیدەین دەدرێت

ئاڤا نیوز

گێڕانەوەی پێشینە بەبێ ئاگاداری و ڕەزامەندی فەرمانبەرانی بەڕێوەبەرایەتیی گشتیی پەروەردەی میسان لەلایەن بانکی ڕافیدەینەوە، ناڕەزایەتی بەڕێوەبەرایەتییەکەی لێدەکەوێتەوە و هەڕەشەی هەڵوەشانەوەی گرێبەستەکەیان لەگەڵ بانکەکە دەکەن.

وێنە گەورەکە: بانکەکانی بەشدار لە پرۆسەی تەوتینی مووچە لە عێراق، بە هۆکاری درەنگ دابەشکردنی مووچە، وەرگرتنی پارەی زیادە لە مووچەخۆران و گێڕانەوەی پێشینەکان بێ ڕەزامەندیی فەرمانبەران تۆمەتبار دەکرێن.

نووسراوی فەرمی: بەڕێوەبەرایەتی گشتیی پەروەردەی میسان لە نووسراوێکدا کە ڕێککەوتنی 4-7-2024ی لەسەرە و ئاراستەی بانکی ڕافیدەینی کردووە، هۆشداری داوە لەوەی بێ ئاگاداری پارەی پێشینەیان لە کارمەندەکانیان گێڕاوەتەوە، ئەمەش پێچەوانەی ئەو گرێبەستەیە کە لەنێوان ئەوان و بانکەکەدا کراوە.

زانیاریی زیاتر: بەڕێوەبەرایەتییەکە هۆشداری داوەتە بانکی ڕافیدەین ئەگەر بەمشێوەیە مامەڵە بکەن ئەوا گرێبەستەکە هەڵدەوەشێننەوە، داوای قەرەبووش دەکەن بەهۆی ئەو زیانەی بە فەرمانبەرەکانیان گەیشتووە.

ئەوەی پێویستە بیزانیت: سەرەتای مانگی ئایاری ڕابردوو پەروەردەی دیوانییە بەتووندی ھۆشداری دایە بانکی ڕافیدەین لە بەرامبەر دواکەوتنی مووچەی فەرمانبەرەکانیان، بەهەمانشێوە لە ئەگەری پابەند نەبوون هەڕەشەی هەڵوەشاندنەوەی گرێبەستەکەیان کرد.

ئەمەش بزانە: بەڕێوەبەرایەتیی گشتیی پەروەردەی زیقار لە نووسراوێکدا کە ڕۆژی 7-4-2024 ئاراستەی هەمان بانکی کردبوو، هۆشداری دابوو لە بڕینی قەرزی ئەلیکترۆنی لە فەرمانبەرانیان.