گەشتە ئاسمانییەکانی سووریا و سعودیە دەستپێدەکەنەوە

ئاڤا نیوز

 

هێڵی ئاسمانی نیشتمانیی سووریا دوای 12 ساڵ لە ڕاگرتنی گەشتە ئاسمانییەکانی بۆ سعودیە، دەستی بە گەشتەکانی کردەوە و  ئەمڕۆ یەکەم فڕۆکە گەیشتە ڕیاز.

 

ڕاگەیێنراوی فەرمی: ئەیمەن سوسان، باڵیۆزی سووریا ڕایگەیاند، فڕۆکەیەکی هێڵی ئاسمانیی سووریا کە 170 سەرنشینی هەڵگرتبوو، لە پایتەختی سعودیە نیشتەوە و ئەمەش هەنگاوێکە بۆ دەستپێکردنەوەی پەیوەندییەکان.

 

خاڵی ئەرێنی: ئەم هەنگاوە لێکنزیکبوونەوەیەکی هێواشە لە نێوان ئەو دوو حکومەتە کە لە ساڵی ڕابردووەوە پەیوەندییە دیپلۆماسییەکانیان نوێ دەکەنەوە.

 

باکگراوند: گەشتەکانی نێوان هەردوو وڵات لە ساڵی 2012 ڕاگیرا، کاتێک ڕیاز پەیوەندییەکانی لەگەڵ دیمەشق پچڕاند بەهۆی سەرکوتکردنەکانی بەشار ئەسەد بۆ سەر خۆپیشاندەرانی لە سەرەتای شەڕی ناوخۆی وڵاتەکەدا.